Минтимер Шәймиев ИРСИКА генераль директоры Халит Эрен белән очрашты

Бүген Татарстан Республикасы Дәүләт Киңәшчесе Минтимер Шәймиев Ислам тарихы, сәнгате һәм мәдәнияте фәнни-тикшеренү үзәге (ИРСИКА) генераль директоры Халит Эрен белән очрашты.

ИРСИКА инде күп еллар дәвамында ТР Мәдәният министрлыгы һәм ТР ФАнең Ш.Мәрҗани исемендәге Тарих институты белән хезмәттәшлек итә. Халит Эрен Татарстан Республикасында берничә тапкыр булды: “Бөек Идел юлы” халыкара конференциясен, “Идел-Урал төбәгендә ислам культурасы” халыкара симпозиумын әзерләү һәм уздыруда актив катнашты. 2010 елда ул Казанга “Татар тарихы һәм цивилизациясе” исемле академик басманы инглиз телендә тәкъдир итү тантанасына килде. 2012 елда татар дин эшлеклеләренең “Милли үзенчәлек һәм дин” исемле III Бөтенроссия форумында һәм “Изге Болгар җыены”нда катнашты.

Минтимер Шәймиев Татарстан Республикасына игътибары өчен Халит Эренга рәхмәт белдерде һәм ИРСИКА Татарстанны ислам дөньясына лаеклы рәвештә тәкъдим итүгә ярдәм итте, дип ассызыклады.

Халит Эрен Казанга кичә Уфадан килүен, анда Мөселманнарының Үзәк диния нәзарәте оешуга 225 ел тулуга багышланган тантаналы чараларда катнашуын хәбәр итте. Ул шулай ук кичә ИРСИКА белән Казан федераль университеты арасында хезмәттәшлек итү турында Килешү имзалануы турында сөйләде.

Минтимер Шәймиев кунакка “Яңарыш” республика фонды эшчәнлегендәге яңалыклар, Болгарда тарих һәм мәдәният һәйкәлләрен яңадан торгызу эшләренең барышы белән таныштырды, бу елның май аенда ачылган Болгар цивилизациясе музее хакында сөйләде һәм Халит Эренны тагын бер тапкыр борынгы Болгар шәһәренә чакырды.

Очрашуда ТР ФАнең Ш.Мәрҗани исемендәге Тарих институты директоры Рафаэль Хәкимов катнашты.

Очрашудан соң Халит Эрен һәм Ислам тарихы, сәнгате һәм мәдәнияте фәнни-тикшеренү үзәгенең башка вәкилләре Казан Кремлендә “Татар мәдәниятендә кульязма Коръән" күргәзмәсендә, Кол Шәриф мәчетендәге ислам мәдәнияте музеенда һәм “Эрмитаж-Казан” күргәзмә үзәгендә “Француз импрессионистлары һәм аларның чоры” күргәзмәсендә, шулай ук ТР ФАнең Ш.Мәрҗани исемендәге Тарих институтында булдылар.

Белешмә өчен:
Ислам тарихы, сәнгате һәм мәдәнияте (ИРСИКА) 1980 елда мөселман фәне үсешенә ярдәм итү һәм ислам илләре арасында гуманитар элемтәләрне ныгыту өчен оештырыла. Ислам Хезмәттәшлек Оешмасының мөстәкыйль органы санала.