Энгель Фәттахов: “Без мәктәпкәчә белем бирүне яңа дәрәҗәгә күтәрәбез”

Ата-аналарның балалар бакчалары өчен түләүдәге үзгәрешләр Татарстанда мәктәпкәчә белем бирүнең сыйфаты үсү белән бер вакытта булачак. Бу хакта бүген ТР Министрлар Кабинетында узган брифингта ТР вице-премьеры – фән һәм мәгариф министры Энгель Фәттахов хәбәр итте.

Энгель Фәттахов белдергәнчә, 2014 елның 1гыйнварыннан булачак ата-аналарның түләвендәге үзгәрешләр, “Мәгариф турында” 273-ФЗ яңа федераль законның эшли башлавы белән бәйле.

ТР мәгариф һәм фән министры түләүдәге үзгәрешләр турында сөйләде. Яңа закондагы нормалар буенча, баланы караган өчен чыгымнар өч төркемгә бүленә. Беренчесе – белем бирү хезмәтләре өчен финанс чыгымнары (педагогларның, тәрбиячеләрнең хезмәт хакы, уенчыклар, укыту-методик әсбаблар белән тәэмин итү). Бу чыгымнарны республика бюджеты түли. Коммуналь чыгымнарны – муниципаль бюджет түли. Өченче өлеше балаларны караган өчен ата-аналар түләгән акча. Бу чыгымнар составына - балаларны тукландыру, хуҗалык-көнкүреш, медицина хезмәтләре, медикаментлар өчен чыгымнар, тәрбияче ярдәмчесе, медицина хезмәткәрләре, ашарга әзерләү блогы һәм техник персонал өчен хезмәт хакы фонды чыгымнары керә.

“Әлбәттә, ата-аналарның түләве артачак, әмма шул ук вакытта без мәктәпкәчә белем бирүне яңа дәрәҗәгә күтәрәчәкбез”,-дип ассызыклады ул. Аның сүзләренчә, республикада баланы ай дәвамында балалар бакчасына йөртүнең уртача бәясе якынча 9 мең тәшкил итә, ә ата-аналарның түләве уртача 1500 сум – калган өлешен республика һәм муниципаль бюджет түли.

Энгель Фәттахов хәбәр иткәнчә, ата-аналар өчен компенсацияләр сакланачак – беренче балага 20% күләмендә, икенчесенә – 50%, өченчесенә һәм тагын калганнарына – 70%.
Ата-аналар түләвенең уртача күләме Татарстан Республикасы Министрлар Кабинеты карары белән билгеләнә.

ТР хезмәт, мәшгульлек һәм социаль яклау министр урынбасары Наталья Бутаева белдергәнчә, 2014 нче елның 1 нче гыйнварыннан балалар бакчалары өчен түләү күләме арту сәбәпле, балалы гаиләләргә өстәмә компенсация түләнәчәк.

Наталья Бутаева компенсациягә документларны рәсмиләштерү өчен, балалар бакчасы белән килешү, гаиләдәге барлык балаларның туу турында таныклыгы, гаиләдәге эшләүче әгъзаларның соңгы өч айлык керемнәре турында мәгълүмат, килешү төзегән ата-ананың исәп-хисап счеты номеры кирәклеген хәбәр итте.

ТР Мәгариф һәм фән министрлыгы сайтында - http://mon.tatarstan.ru/rusroditelskaya plata.htm,
ТР мәгариф идарәсе муниципаль органнары сайтында һәм мәктәпкәчә оешмалар сайтында бу үзгәрешләр турында материаллар урнаштырылган.