Алексей Песошин Идел буе физкультура, спорт һәм туризм университетын 50 еллыгы белән котлады
Бүген Казанда Идел буе дәүләт физик культура, спорт һәм туризм университетының 50 еллыгы уңаеннан чаралар уза. Тантанада Татарстан Республикасы Премьер-министры Алексей Песошин катнашты.
Юбилейда мәртәбәле кунаклар арасында-Россия Федерациясе Спорт министрлыгының мәгариф, фән һәм халыкара мөнәсәбәтләр департаменты директоры урынбасары Максим Боев, Татарстан Республикасы Дәүләт Советы депутаты Марат Бариев, министрлыклар һәм ведомстволар вәкилләре, төбәкнең әйдәп баручы тренерлары һәм спортчылары.
Чарада катнашучыларны сәламләп, Алексей Песошин Идел буе дәүләт физкультура университетын Татарстан Республикасы Рәисе Рөстәм Миңнеханов исеменнән һәм шәхсән үз исеменнән 50 еллыгы белән котлады.
"Ярты гасыр дәвамында Татарстанның спорт югары уку йорты физик культура, спорт һәм туризм өлкәсендә югары квалификацияле белгечләр әзерли. Волгоград академиясе филиалыннан «Университет» статусына кадәр юл үтте. Профессор-укытучылар составының, тренерларның һәм университет хезмәткәрләренең югары дәрәҗәсе, барлыкка килгән традицияләр, матди-техник һәм фәнни базаның искиткеч булуы университетка илдә үз өлкәсендә лидерларның берсе булырга мөмкинлек бирде",- диде ТР Премьер-министры.
Ул 2013 елда Казанда узган Бөтендөнья җәйге универсиадасын югары уку йорты өчен хәлиткеч вакыйга дип атады. "Универсиада мирасы концепциясен гамәлгә ашыру нәтиҗәсендә югары уку йорты илдә иң яхшы матди-техник базага ия булды - бу спорт объектлары, тулай тораклар һәм укыту - лаборатория корпусы, без аның диварларында торабыз, - диде Алексей Песошин. - Идел буе университеты бүген - Россиянең 83 төбәгеннән һәм 17 чит илдән 4 000нән артык студент, югары уку йортын тәмамлаучылар – Олимпия уеннары, дөнья һәм Европа чемпионатлары җиңүчеләре һәм призерлары».
Татарстан Республикасы Министрлар Кабинеты башлыгы ассызыклаганча, университетның уңышлы үсеше - бөтен коллективның - җитәкчеләрнең, укытучыларның, хезмәткәрләрнең һәм ветераннарның системалы һәм командалы эше. Ул Россия Федерациясе Спорт министрлыгына даими ярдәм иткәннәре өчен рәхмәт белдерде. Шулай ук хезмәтләре өчен рәхмәт сүзләре университет җитәкчелегенә, укытучылар составына, административ-техник персоналга, хөрмәтле ветераннарга юлланды.
Алексей Песошин сүзен йомгаклап, университетка алга таба да чәчәк атуын, ә аның хезмәткәрләренә эшләрендә уңышлар теләде!
Аннары дәүләт бүләкләрен тапшыру тантанасы булды. Татарстан Республикасы Дәүләт бүләге - «Дуслык» ордены белән Идел буе дәүләт физик культура, спорт һәм туризм университеты ректоры Рафис Борһанов бүләкләнде.
Россия Федерациясе Спорт министрлыгының мәгариф, фән һәм халыкара мөнәсәбәтләр департаменты директоры урынбасары Максим Боев Россия спорт министры Михаил Дегтярев исеменнән югары уку йортына котлау сүзләрен укыды.