Марат Әхмәтов: “Октябрьдә Татарстанның кайбер районнарында сөт җитештерүнең кимүенә юл куелган”

Татарстан Республикасында185 мең т шикәр җитештерү көтелә, бүгенге көнгә 80 мең т продукция җитештерелгән инде. Бу хакта бүген Татарстан Республикасы Хөкүмәт Йортында узган киңәшмәдә ТР Премьер-министры урынбасары – авыл хуҗалыгы һәм азык-төлек министры Марат Әхмәтов хәбәр итте.

Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Анда шулай ук ТР Премьер-министры Илдар Халиков катнашты.

Гомумән республикада шикәр чөгендеренең тулай җыемы 2 млн.т тәшкил итәчәк, якынча 2 мең гектарны җыеп аласы калды, дип ачыклык кертте Марат Әхмәтов. Иң “шикәр”ле районнар булып Буа һәм Зәй районнары санала.
Көнбагыш уңышы быел 13,9 ц/га тәшкил итә, бүгенге көнгә 34 мең га суктырылган (42%).
Татарстан Республикасында туфрак эшкәртү эшләре бара, бүгенгә 1,750 млн. га эшкәртелгән, бу 84% тәшкил итә,-дип хәбәр итте Марат Әхмәтов.

Терлекчелектәге, шул исәптән сөтчелектәге хәлләр турында җентекләбрәк сөйләде.Министр сүзләренчә, октябрьдә кайбер районнарда сөт җитештерүнең кимүенә юл куелган. Ул муниципаль район башлыкларын һәм инвестиция компанияләренең җитәкчеләрен бу мәсьәләгә җитди карарга чакырды. Инвестиция компанияләреннән сөт җитештерү күрсәткечләре “Ак Барс”, “Агросила”, “Просто молоко” холдинг компанияләре хуҗалыкларында кимегән.

1 кг товарлыклы сөт өчен субсидияләргә килгәндә, Марат Әхмәтов искәрткәнчә, 2014 нче елда субсидияне сөт производствосын кимендә үткән ел күләме кадәр сөт белән тәэмин итүчеләр алачак.

Министр савымчыларны лаеклы хезмәт хакы белән тәэмин итәргә чакырды. Сыер савучыларның хезмәт хакы аларның эшләре өчен стимул булырга тиеш, бигрәктә бүген сөт сатып алуның бәясе 1,5-2 тапкыр арткан вакытта.

ТР авыл хуҗалыгы һәм азык-төлек министры хәбәр иткәнчә, киләсе елда саву җиһазларын бик күп күләмдә яңарту көтелә.