Валентина Матвиенко Зөя утрау-шәһәрендә булды

РФ Федераль Җыены Федерация Советы рәисе Валентина Матвиенко ТР Дәүләт Советы рәисе Фәрид Мөхәммәтшин озатуында утрау-шәһәрнең православие һәм тарих-архитектура объектларын карады.

Экскурсия барышында Валентина Матвиенко “Татарстанның мәдәни мирасы: борынгы Болгар шәһәре һәм Зөя утрау-шәһәре” комплекслы программа кысаларында киң күләмдә алып барылган яңадан торгызу һәм реставрация эшләренең барышы белән танышты. Бу эш белән “Яңарыш” республика фонды шөгыльләнә, Попечительлек Советын Татарстан Республикасы Дәүләт Киңәшчесе Минтимер Шәймиев җитәкли.

Экскурсия башында Валентина Матвиенкога Зөя Богородице-Успение монастыреның архитектура ансамблен күрсәттеләр.
Игумен Силуан кунакларга Успение Соборында реставрация эшләре барышында яңадан торгызылган уникаль фрескалар турында сөйләде. Алар XVI йөз урталарыннан безнең көннәргә кадәр килеп җиткән бердәнбер фрескалар ансамбле санала.
Дәрәҗәле кунаклар шулай ук яңадан торгызылган сәүдәгәр Каменев Йортын карадылар, хәзерге вакытта ул кунакханә комплексы булып тора.
Экскурсия Иоанно-Предтеченский монастыреның Троицкий чиркәвен һәм “Всех Скорбящих Радость” соборын карау белән тәмамланды.

Валентина Матвиенко истәлекләр китабында мондый сүзләр язып калдырды: “Безнең тарихның уникаль тарихи ядкәрләрен яңадан торгызуга үзләренең талантын, үзләренең хезмәтен кертүчеләрнең барысына да зур рәхмәт. Минтимер Шәрип улы Шәймиевкә һәм аның командасына зур рәхмәт”.

Экскурсиядә шулай ук Федерация Советы Комитетының бюджет һәм финанс базарлары буенча әгъзасы, Татарстан Республикасы дәүләт хакимиятенең башкарма органы вәкиле Сергей Батин, ТР Президентының социаль мәсьәләләр буенча ярдәмчесе, “Яңарыш” фондының башкарма директоры Татьяна Ларионова, Яшел Үзән районы башлыгы Александр Тыгин катнашты.