Минтимер Шәймиев Россия Бәйсез профсоюзлар федерациясе рәисе Михаил Шмаков белән очрашты

Бүген Татарстан Республикасы Дәүләт Киңәшчесе Минтимер Шәймиев Татарстанга эшлекле визит белән килгән Россия Бәйсез профсоюзлар федерациясе рәисе Михаил Шмаков белән очрашты.

Михаил Шмаков бүген борынгы Болгар шәһәрендә булды һәм Болгар тарих-архитектура саклаулыгында булган экскурсиядән алган тәэсирләре белән уртаклашты. Ул тарихи истәлекләрне яңадан торгызу һәм реставрацияләү белән бергә, борынгы шәһәрне яңартуга зур игътибар бирелүенә соклануын белдерде, яңа корылмалар – Ак мәчет, Икмәк музее, Болгар цивилизациясе музее белән тоташкан Елга вокзалы барлыкка килүен аерым билгеләде. “Бу искиткеч, заманча музейда мин хәзерге Росссия территориясендә исламны кабул итү тарихы турында күп яңалык белдем, руслар православиене кабул итүгә караганда, ислам Идел буе болгарлары тарафыннан ярты гасырга иртәрәк кабул ителгән”,-дип ассызыклады ул.

“Яңарыш” Республика Фондының Попечительләр Советы рәисе Минтимер Шәймиев Михаил Шмаковка Фондның “Татарстанның мәдәни мирасы: борынгы Болгар шәһәре һәм Зөя утрау-шәһәре” проектын гамәлгә ашыру буенча эшчәнлеге турында сөйләде.

Михаил Шмаков Минтимер Шәймиевкә Чаллы шәһәрендә, “КамАЗ” ААҖнең җитештерү коллективында ике көнлек эшлекле очрашуда булуы турында сөйләде.

Очрашу барышында Россия Бәйсез профсоюзлар федерациясе белән Татарстан Республикасы Профсоюзлар федерациясенең хезмәттәшлек перспективалары турында фикер алыштылар.

Очрашуда шулай ук ТР Президентының социаль мәсьәләләр буенча ярдәмчесе, “Яңарыш” Фондының башкарма директоры Татьяна Ларионова, ТР Профсоюзлар федерациясе рәисе Татьяна Водопьянова катнашты.