Илдар Халиков Elsevier компаниясенең вице-президенты белән фән-белем бирү һәм тикшеренү өлкәсендә хезмәттәшлек перспективалары турында фикер алышты

Бүген Татарстан Республикасы Премьер-министры Илдар Халиков Elsevier («Эльзевир») компаниясенең стратегия һәм үсеш буенча вице-президенты Джей Си Ханеке белән фән-белем бирү һәм тикшеренү өлкәсендә хезмәттәшлек перспективалары турында фикер алышты.
Очрашу ТР Хөкүмәт Йортында узды, анда катнашу өчен Татарстан Республикасының әйдәп баручы югары уку йортлары ректорлары, ТР Фәннәр академиясе вәкилләре һ.б. чакырылган иде.

“Эльзевир” – фән, мәгариф һәм медицина өлкәсендә продукция һәм инновацион нәтиҗәләр тәкъдим итүче дөньяда иң зур нәшрият. Компаниянең Амстердам, Нью-Йорк, Лондонда штаб-квартиралары һәм бөтен дөнья буйлап 70ләп офисы бар. Нәшрият – Reed Elsevier медиа-холдингның бер өлеше, ул дөньядагы 500 иң зур компанияләр исемлегенә керә.

Компания 4,5 мең мәгариф учреждениеләре һәм фәнни-тикшеренү институтларыннан 10млн. нан артык тикшеренүчеләр, китапханәчеләр, галимнәр, авторлар һәм редакторлар белән хезмәттәшлек итә.

Кунакны сәламләп, Илдар Халиков, бүген Татарстан югары уку йортлары бөтен дөнья фәнни инфраструктурасында таныла бара, дип белдерде. 2000елдан Татарстанда фәнни проектларны финанслау ун тапкыр арткан. Аның сүзләренчә, Татарстан югары уку йортларының “Эльзевир” белән партнерлыгы аларның конкуренциягә сәләтлелекләрен арттырачак.

“Эльзевир” компаниясе вице-президенты Джей Си Ханеке компания мөмкинлекләренең кыскача презентациясен уздырды, аның оешу тарихы һәм фәнни публикацияләр базарында заманча тоткан урыны турында сөйләде.