ТР Сәүдә һәм сәнәгать министрлыгы белән “Европа бизнесы ассоциациясе”коммерцияле булмаган партнерлыгы арасында Үзара аңлашу турында килешү имзаланды

Бүген Татарстан Республикасы Премьер-министры Илдар Халиков Европа бизнесы ассоциациясе генераль директоры Франк Шауфф белән очрашты.
Очрашу ТР Хөкүмәт Йортында узды, анда шулай ук ТР Премьер-министры урынбасары – ТР сәүдә һәм сәнәгать министры Равил Зарипов, Татарстан Республикасы Предприятиеләре һәм эшмәкәрләре ассоциациясе җитәкчесе Александр Лаврентьев һ.б. катнашты.

Илдар Халиков кыскача, төбәкнең икътисады, сәнәгатьнең әйдәп баручы тармаклары һәм “Алабуга” махсус икътисадый зона кебек инновацион мәйданчыклар, югары технологияләр өлкәсендәге технопарк – ИТ-парк һ.б. турында сөйләде. Бүген Татарстан Республикасы территориясендә күп санда чит ил инвестицияләре катнашындагы предприятиеләр теркәлгән, дип белдерде ул. Химия, нефть химиясе, машиналар төзелеше тармаклары үсеш алган.

Франк Шауфф белдергәнчә, Татарстан бүген – Россиянең иң көчле үсеш алган, чит ил, шул исәптән Европа инвестицияләрен җәлеп итәрлек төбәкләренең берсе.

Очрашу барышында “Мессе Франкфурт Рус” генераль директоры Ойген Аллес кыскача презентация белән чыгыш ясады.”Мессе Франкфурт Рус” күргәзмә эшчәнлеге алып бара, ул дөньяда бу юнәлештә эшләүче иң зур компанияләрнең берсе, Франкфурт-на-Майне шәһәрендә аның үз күргәзмә комплексы бар. Киләчәктә “Мессе Франкфурт Рус” Россиянең төбәк базарларына, аерым алганда Татарстан Республикасыныкына чыгарга планлаштыра.

Очрашу тәмамланганда Татарстан Республикасы Премьер-министры Илдар Халиков катнашында, ТР Сәүдә һәм сәнәгать министрлыгы һәм “Европа бизнесы ассоциациясе” коммерцияле булмаган партнерлыгы арасында Үзара аңлашу турында килешү имзаланды. Документка ТР Премьер-министры урынбасары - ТР сәүдә һәм сәнәгать министры Равил Зарипов һәм Европа бизнесы ассоциациясе генераль директоры Франк Шауфф имзаларын куйдылар.