Минсәгыйр Нуретдинов: Татарстанда быел шикәр чөгендере уңышы – республикада әлеге культураны үстерү тарихында иң югары

Быел Татарстанда шикәр чөгендере уңышы – республикада әлеге культураны үстерү тарихында иң югары, ул 383 ц/га тәшкил итә.

Бүген ТР Хөкүмәте Йортында узган брифингта ТР авыл хуҗалыгы һәм азык-төлек министры урынбасары Минсәгыйр Нуретдинов хәбәр иткәнчә, бүгенгә республикада 55,3 мең га мәйданнан 2 млн. тоннадан артык шикәр чөгендере җыеп алынган. Кырлардан якынча 1,3 млн. т баллы тамыразык чыгарылган, якынча 700 мең т шикәр чөгендере казып алынган, ләкин әлегә алар кырда кала. 500 мең тоннадан артыгы эшкәртелгән, 118 мең тоннадан артык шикәр комы алынган. Бу ТР халкы ихтыяҗын тулысынча каплый, дип билгеләде М.Нуретдинов.

Шул ук вакытта, барлык шикәр чөгендерен тиз арада эшкәртү өчен, ТР шикәр заводларының куәте җитми. Шуңа күрә эшкәртү эше февральгә кадәр сузыла ала, бу югалтуларга китерәчәк. Министр урынбасары сүзләренчә, эшкәртү өчен, шикәр чөгендеренең бер өлешен Түбән Новгород һәм Ульянов өлкәләренә җибәрү мәсьәләсе карала.

Әле җыелып бетмәгән башка авыл хуҗалыгы культураларына килгәндә, министр урынбасары сүзләренчә, 2 мең га мәйданда кукурузны һәм бик аз мәйданда көнбагышны җыеп аласы калган. М.Нуретдинов билгеләп үткәнчә, кукурузның уңышы югары диярлек - 40 ц/га артык.

М.Нуреднинов искәртеп үткәнчә, быел ТРда 2,8 млн. т бөртекле ашлык җыеп алынган. Республика яшелчәләр һәм бәрәңге белән тулысынча тәэмин ителгән. “Икенче икмәк”нең тулай күләме 1,3 млн. т булган, уртача уңыш - 170 ц/га.
Киләсе ел уңышына 588,5 мең га мәйданга көзге бөртекле культуралар чәчелгән.