Татарстанда 2025 елның җәйге савыктыру кампаниясе план күрсәткечләрен арттырып тәмамланды

2025 елда Татарстанда балалар һәм яшьләрне җәйге савыктыру кампаниясе план күрсәткечләрен арттырып тәмамланды. Бу хакта ТР Министрлар Кабинетында узган брифингта ТР яшьләр эшләре министры Азат Кадыйров белдерде.

"170 000 гә якын бала ял итүнең барлык рәвешләрендәге 1618 оешмада ял иткән. Бу планнан бераз югарырак", - дип сөйләде Азат Кадыйров.

Ул ассызыклаганча, балаларның ялын һәм сәламәтлеген ныгытуны оештыру республиканың социаль сәясәтендә өстенлекле юнәлеш булып тора, һәм вице-премьер җитәкчелегендәге ведомствоара комиссиягә җайга салынган эшләре өчен рәхмәт белдерде.

«2025 елның уңышлы узган җәйге савыктыру кампаниясе безнең Хөкүмәт вице-премьеры җитәкчелегендәге ведомствоара комиссиянең актив эше нәтиҗәсендә булды, ул җәйге савыктыру кампаниясенең көндәлек процессының барлык детальләренә тулысынча җәлеп ителгән», – диде Азат Кадыйров.

Ул шулай ук көзге каникулларга планнар турында да белдерде. "Көзге каникуллар вакытында 23 муниципаль берәмлектә 40 лагерь һәм Кырым Республикасында бер лагерь эшләячәк. 6000нән артык бала бу мөмкинлектән файдаланыр дип өметләнәбез», – дип йомгаклады министр. 2025 елда 35 487 бала лагерьларга һәм шифаханәләргә юлламаларны тулысынча республика бюджеты хисабына алды. Бу максатларга 549,1 млн сум җибәрелгән, дип хәбәр итте брифингта Азат Кадыйров.

Ул бушлай юлламалар алучылар категорияләрен төгәлләштерде. Кыен тормыш хәлендә калган балалар өчен 8270 юллама. 4360 юллама аз керемле гаиләләрдәге балалар өчен бирелгән. 1023 юллама - профилактик исәптә торучы балалар өчен. Сәламәтлеге мөмкинлекләре чикләнгән балалар өчен тагын 328 юллама бирелгән. 3019 юллама - сәләтле балалар өчен.

"Гаиләнең матди хәленә карамастан, барлык балаларны сыйфатлы ял белән тәэмин итү – республика социаль сәясәтенең мөһим өлеше", – дип ачыклык кертте Азат Кадыйров.

ТР Яшьләр эшләре министры хәбәр иткәнчә, мобилизацияләнгән гражданнарның гаиләләрендәге балаларга аерым игътибар бирелгән. Шундый 7540 бала ял итә алган, бу планнан артып киткән.

Азат Кадыйров шулай ук брифингта хәбәр иткәнчә, киләсе елда Татарстанның 9 районында һәм Анапада 14 балалар лагерен ремонтлауга Татарстан 1,3 млрд сум бүлеп бирәчәк.

Министр мәгълүматлары буенча, 2025 елда Татарстанда 20 балаларны савыктыру лагере ремонтланган (шуларның берсе Анапада). Әгерҗе районының «Алмалы» һәм Ютазы районының «Дубравушка» лагерьларында эшләр төгәлләнгән инде. Азат Кадыйров билгеләп үткәнчә, балалар өчен савыктыру лагерьларында йокы корпуслары, ашханәләр һәм спорт мәйданчыклары ремонтлана.