Минтимер Шәймиев Самара өлкәсе “Туган тел” татар җәмгыяте вәкилләре белән очрашты

Бүген Казан Кремлендә Татарстан Республикасы Дәүләт Киңәшчесе, “Яңарыш” фондының Попечительлек советы рәисе Минтимер Шәймиев Самара өлкәсе “Туган тел” татар җәмгыяте президенты Ильяс Шәкүров, җәмгыять советы әгъзасы, татарларның милли-мәдәни автономиясе җитәкчесе Рифкәт Хуҗин, “Болгар мирасы” тарихи-мәдәни фондының Попечительлек советы рәисе Гомәр Батыршин белән очрашты.

Очрашуның башында Самара кунаклары Минтимер Шәймиевкә “Канатлы барс” истәлек билгесенең күчермәсен тапшырдылар, ул 2012 елда “Болгар мирасы” фонды тарафыннан Самара өлкәсенең Ширәй авылында куелган. Аннары “Туган тел” җәмгыяте инициативасы һәм ярдәме белән дөнья күргән якынча ике дистә китап тәкъдим ителде. Алар арасында Идел буе татарлары тарихы, русча-татарча сүзлекләр һәм ике телдә, 2012 елның декабреннән чыга башлаган “Самара татарлары” журналы бар.

Ильяс Шәкүров Минтимер Шәймиевне 1989 елда оештырылган “Туган тел” җәмгыяте эшчәнлеге белән таныштырды. Җәмгыять бүгенге көндә татар теле һәм мәдәниятен популярлаштыру буенча зур эш алып бара. Ел саен татар теле буенча олимпиадалар, конкурслар үткәрелә, Самара татарлары тормышы турынла документаль фильмнар төшерелә, татарлар яши торган шәһәрләрдә һәм авылларда милли бәйрәмнәр уздыруга ярдәм күрсәтелә. “Самара татарлары” дип аталган яңа мәгълүмати медиа-порталы эшли башлады. 2012 елда Самарада “Туган тел” җәмгыяте “Түгәрәк уен” V Бөтенроссия татар фольклоры фестивален оештыруда һәм уздыруда катнашты.

Очрашу барышында күптеллелек даирәсендә татар телен һәм мәдәниятен саклау һәм үстерү проблемасы буенча фикер алыштылар. “Бүгенге көндә бу проблемалар дөньяның барлык милләтләре алдында тора, шуңа күрә туган телне өйрәнү буенча яңа юллар һәм стимул бирү ысулларын эзләргә һәм табарга кирәк” - диде Минтимер Шәймиев.

Очрашу тәмамланганда Ильяс Шәкүров Минтимер Шәймиевне киләсе елда булачак “Туган тел” җәмгыятенең 25 еллыгын бәйрәм итүгә чакырды.