Марат Әхмәтов: Без 2014 нче елдан авыл хуҗалыгы техникасын алу программасын “60% ка 40%” схемасы буенча ныклап гамәлгә ашырырга телибез

Татарстан Республикасында 2014 нче елдан авыл хуҗалыгы техникасын яңарту турында бүген ТР Хөкүмәте Йортында узган республика киңәшмәсендә ТР Премьер-министры урынбасары – авыл хуҗалыгы һәм азык-төлек министры Марат Әхмәтов сөйләде.
Киңәшмә республиканың барлык муниципаль районнары белән видеоконференцэлемтә режимында булды, аны ТР Премьер-министры Илдар Халиков уздырды.

Бүген авыл хуҗалыгы җитештерүчеләренең 15 меңнән артык тракторы, 5 мең йөк ташу машинасы, 4,5 меңнән артык төрле комбайн һәм авыл хуҗалыгы техникасы бар, дип хәбәр итте Марат Әхмәтов. Шул ук вакытта техниканың күбесе 10 елдан артык кулланыла һәм яңартуны таләп итә. Федераль һәм төбәк дәрәҗәсендәге авыл хуҗалыгы җитештерүчеләренә ярдәм итү буенча төрле программалар 2006 нчы елдан техниканың бер өлешен яңартырга мөмкинлек бирде.

Марат Әхмәтов белдергәнчә, республика «Росагролизинг» белән тыгыз хезмәттәшлек итә. Лизинг шартлары кабул итәрлек, - диде ул.

Без 2014 нче елдан авыл хуҗалыгы техникасын алу программасын ныклап гамәлгә ашырырга телибез, - диде министр. Программа 3 елга исәпләнгән. Ел саен “60% ка 40%” схемасы буенча техника алуга 2 млрд.сум бүлеп бирү планлаштырыла. 40% ын ТР Хөкүмәте бүлеп бирәчәк, калган 60% ын авыл хуҗалыгы җитештерүчеләре бирергә тиеш була.Мондый схема ел саен 5-6 млрд.сумлык яңа авыл хуҗалыгы машиналарын алырга мөмкинлек бирер, дип көтелә.
Марат Әхмәтов шулай ук хәбәр иткәнчә, газ ягулыгында эшли торган техника алуга лимитсыз субсидия биреләчәк. Бәлкем, мондый төр техникага федераль бюджеттан да субсидия бирелер.