Татарстан Республикасы Президенты Р.Н. Миңнехановның ЯҢА ЕЛ МӨРӘҖӘГАТЕ

Хөрмәтле ватандашлар!
Яңа ел – көтеп алынган үзенчәлекле бәйрәм. Ул якты өметләр һәм яхшы кәеф, йомгак ясау һәм киләчәккә планнар төзү вакыты. Киләсе ел һәркайсыбыз өчен куанычлар һәм шатлыклы мизгелләр белән тулы булыр дип ышанам.
2013-нче ел Татарстанда XXVII Бөтендөнья Универсиадасы билгесе астында узды. Уеннар чын мәгънәсендә яшьлек һәм спорт, дуслык һәм татулык бәйрәме булды. Аңа әзерләнү һәм үткәрү чорында ярдәм күрсәткән барлык татарстанлыларга ихлас күңелдән рәхмәтемне җиткерәсем килә.
Гаять зур эш эшләнде. Универсиада башкалабызны да, үзебезне дә үзгәртте. Безне тагын да ачыграк һәм уңышлырак итте, бөтен дөньяга сибелгән яңа дуслар һәм танышлар өстәде.
Икътисадта һәм социаль өлкәдәге тотрыклылык татарстанлыларга киләчәккә ышаныч белән карарга мөмкинлек бирә. Демографиядәге уңай үзгәрешләр, ватандашларыбызның фәнни һәм мәдәни казанышлары моны раслый.
Ләкин без уңышка ирешкәч, туктап калмыйбыз. Бүген Татарстан үсешенең өр-яңа этабына аяк баса. Республика алдында яңа амбицияле бурычлар тора. Бу – илдә аналогы булмаган нефтехимия һәм сәнәгать өлкәсендәге дөньякүләм яңа проектлар, Иннополис һәм СМАРТ Сити киләчәк шәһәрләрен төзү, логистика инфраструктурасын үстерү, кече һәм урта бизнеска ярдәм күрсәтү. Уртак тырышлык белән бу планнар, һичшиксез, тормышка ашачак.
Уңышлар белән беррәттән югалтуларыбыз да булды. Уртак өебездәге тынычлыкны һәм татулыкны бозырга тырышу очраклары безне тагын да берләштерде. Халкыбызның гореф-гадәтләре кискен карашларны кабул итми, чөнки алар тынычлык һәм татулык яклы.
Киләсе ел Мәдәният елы дип игълан ителгән. Мәркәзебез Казан 2014-нче елда төрки дөньяның башкаласы булу безне бик куандыра. Татарстанлылар Мәдәният елына багышланган күпләгән чараларда теләп катнашырлар дип ышанам.
Кадерле дуслар!
Яңа ел уңышлы һәм имин булсын, күңел түрендәге иң кадерле теләкләребез тормышка ашсын, максатларга ирешелсен!
Яңа 2014-нче ел белән!
Татарстан Республикасы Президенты Р.Н. Миңнеханов