2013 елда Татарстан Республикасында 480 мең тонна терлек һәм кош ите җитештерелгән

2013 елда Татарстан Республикасында 480 мең тонна терлек һәм кош ите җитештерелгән. Бу хакта бүген Татарстан Республикасы Хөкүмәт Йортында узган республика киңәшмәсендә ТР авыл хуҗалыгы һәм азык-төлек министрының терлекчелек буенча урынбасары Нәҗип Хаҗипов хәбәр итте.

Киңәшмәне республиканың барлык муниципаль районнары белән видеоконференцэлемтә режимында Татарстан Республикасы Премьер-министры Илдар Халиков уздырды.

Нәҗип Хаҗипов хәбәр иткәнчә, 2013 елда терлек һәм кош ите җитештерү 2012 ел белән чагыштырганда, 6%ка арткан. 2014 елда 500 мең тоннага җиткерү уйланыла.
2013 елда терлекчелек продукциясеннән 42 млрд. сум акча кергән. Аерым нәтиҗәләргә терлекчелектә “Камский Бекон” ирешкән (2013 елда 46 мең тонна җитештергән, 2012 ел белән чагыштырганда 30%ка артык. 2014 елда 50 мең тонна көтелә).

Нәҗип Хаҗипов хәбәр иткәнчә, 2014 елның 6 гыйнварында ТР Авыл хуҗалыгы һәм азык-төлек министрлыгы авыл хуҗалыгы бердәмлекләре вәкилләре белән эшлекле очрашу уздырырачак. Очрашудан соң, авыл хуҗалыгы тармагы эшчәнлегенә йомгак ясалачак.