Илдар Халиков Түбән Камада җәмәгать судьялары өчен бина ачуда катнашты

Бүген Түбән Камада җәмәгать судьялары өчен бина ачылды. Тантаналы чарада Татарстан Президенты вазыйфаларын башкаручы, ТР Премьер-министры Илдар Халиков, шәһәр мэры Айдар Метшин, республиканың Югары суды рәисе Илгиз Гыйләҗев, юстиция министры Лариса Глухова, Суд департаменты идарәсе башлыгы Җәүдәт Салихов, Татарстанның шәһәр һәм район судлары рәисләре катнашты.

Түбән Кама җәмәгать судьялары бинасына Татарстан Республикасы Хөкүмәте булышлыгы белән “Җәмәгать юстиция институты үсеше” дигән озын сроклы максатчан программа кысаларында капиталь ремонт ясалды. Бу бина өч катлы, гомуми мәйданы 1973 кв.метр, монда халык һәм юстиция аппараты өчен кирәкле барлык шартлар тудырылган. Бина тулысынча яңа җиһаз һәм кирәкле техника белән җиһазландырылган.

Үзенең чыгышында Илдар Халиков Түбән Кама юстиция аппаратын яңа бина белән котлады, һәм җәмәгать судьяларының яңа бинасы барлык таләпләргә, шул исәптән куркынычсызлык таләпләренә дә туры килә, дип белдерде.

“Мин Айдар Метшинга бу мөһим һәм кирәкле проектны гамәлгә ашыру инициатор булганы өчен рәхмәт белдерәм. Бу зур эш аның шәхси күзәтчелегендә башкарылды”,- дип ассызыклады Илдар Халиков.
Тантаналы чара тәмамланганда Илдар Халиков капиталь ремонтны башкарган “Стройхимсервис” ҖЧҖ коллективына рәхмәт белдерде. Бүген шулай ук грамота һәм рәхмәт хатларын Түбән Каманың 2 җәмәгать һәм 4 федераль судьясы алды.