“Россия почтасы” Казан логистик үзәге төзелешенә 2 млрд сум инвестиция бирә

ТР Министрлар Кабинеты белән “Почта России” ФДУП арасында Татарстан территориясендә Росссия почтасы элемтәсен камилләштерү буенча документ имзаланды. ТР Премьер-министры Илдар Халиков һәм “Россия почтасы” ФДУП генераль директоры Дмитрий Страшнов кул куйган әлеге рәсми кәгазьдә Казан почта логистик үзәге төзү мәсьәләсе буенча хезмәттәшлек итү күздә тотыла.

Аерым алганда, “Казан” халыкара аэропортыннан ерак булмаган урында 2015 елга тулы көченә эшли башлаячак почта логистик үзәге төзелешенә “Почта России” ФДУП 2 млрд. сумга якын суммада инвестиция кертмәкче була. Шулай да, объект тест режимында ел ахырында ук гамәлгә кертеләчәк. Нәтиҗәдә, Казанның почта логистик үзәгенең автомат системасы тәүлегенә шушы хезмәт аша җибәрелгән 500 меңләп әйберне эшкәртә алачак, шуларның 10-15 проценты халыкара дәрәҗәдәге санала. Генераль директор сүзләренчә, ил буенча шундый 8 логистик үзәк төзү планлаштырыла.

Хезмәттәшлек турындагы документ имзалау бүген Казан үзәгендәге ИТ-паркта уздырылган ТР Мәгълүматлаштыру һәм элемтә министрлыгының 2013 елда алып барган эшчәнлегенә йомгак ясауга һәм 2014 елга бурычлар игълан ителүгә багышланган коллегия утырышы ахырында тантанашы чара рәвешендә үткәрелде.