ТРда табигатьне саклау законын бозучыларга 2013 ел өчен 28 млн сум штраф салынган

Бүген ИТ-паркта ТР Экология һәм табигый байлыклар министрлыгының коллегия утырышы узды. Чарада ТР Премьер-министры Илдар Халиков, ТР Премьер-министры урынбасары - ТР мәгълүматлаштыру һәм элемтә министры Роман Шәйхетдинов, Түбән Кама шәһәре һәм муниципаль районы башлыгы Айдар Метшин катнашты.

ТР экология һәм табигый байлыклар министры Артем Сидоров сүзләренчә, хәзерге вакытта республиканың зур шәһәрләрендә атмосфера һавасының сыйфаты начар булу, җитештерү һәм куллану калдыклары белән эшләү системасы булмау, Түбән Кама сәнәгать зонасының экологик хәле, киң таралган файдалы казылмаларны законсыз рәвештә табу - Татарстан экологиясенә кагылышлы төп проблемалар.

Министр, атмосфераның экологик яктан чиста булуын тәэмин итү өчен, шактый зур эшләр эшләнүен ассызыклады. Мәсәлән, узган ел һавага зарарлы матдәләр чыгаручы предприятиеләрдә атмосфера һавасын локаль күзәтү механизмы файдаланылышка кергән. Система Түбән Каманың «ТАНЕКО» ААҖендә эшли. «Шулай ук системага "Нижнекамскнефтехим" ААҖе, ТГК-16, Түбән Кама җылылык электростанциясе дә кушыла», - дип белдерде бу уңайдан Артем Сидоров. Аның сүзләренчә, бу тәҗрибәне республиканың барлык территориясендә дә кулланышка кертәчәкләр.

Табигатьне саклау өлкәсендә закон бозуларның күләмен киметү өчен, күзәтү һәм сак хезмәте булдырырга кирәк дип саный министр. Бу максатларда 2013 елда табигатьне саклау законы үтәлешен күзәткән 7163 тикшерү үткәрелгән, закон бозылган 6147 очрак теркәлгән. Хокук бозучыларга барлыгы 28 млн. сум күләмендә штраф салынган. Һава атмосферасын саклау законы үтәлмәү аркасында, Казан, Яр Чаллы, Мамадыш, Тукай районнарында предприятиеләрнең эшчәнлеге туктатылган.

ТР экология һәм табигый байлыклар министры Артем Сидоров агымдагы елда куелган төп бурыч - җитештерү һәм куллану калдыклары белән эшләүнең системасын барлыкка китерү, дип ассызыклады. Беренче чиратта, калдыклар урнаштырылган объектларны җиһазлаячаклар, икенче эш итеп торак комплексларында һәм предприятиеләрдә калдыклар барлыкка килүне аларның кайда озатылуын исәпкә алырга кирәк була.
Социологик сораштыру нәтиҗәләре буенча, узган ел халыкның күп өлеше Татарстандагы экологик хәлне уңай бәяләде, дип хәбәр итте Артем Сидоров.