ТР Премьер-министры Сарман муниципаль район советы сессиясендә катнашты

Бүген ТР Премьер-министры Илдар Халиков Татарстанның Сарман районында эш сәфәре белән булды. Ул узган ел файдалануга тапшырылган берничә объектта булды, аларда урнашкан учреждениеләр эшчәнлеге белән танышты, муниципаль берәмлекнең 2013 ел социаль-икътисади үсеше нәтиҗәләренә һәм 2014 ел бурычларына багышланган район советы сессиясендә катнашты.

Дәүләт һәм муниципаль хезмәтләр күрсәтә торган күп функцияле үзәк узган ел ахырында ачылды. Бүген биредә халыкка 16 төрле дәүләт һәм 12 төрле муниципаль хезмәт күрсәтелә.

Җәмәгать судьялары эшли торган бинада капиталь ремонт үткәрелгән, хезмәткәрләр, шулай ук халык өчен дә кирәкле шартлар тудырылган. Илдар Халиков, бүлмәләрне карагач, алар кайбер шәһәр бүлмәләреннән дә заманча һәм уңайлырак, диде.

“Сарман” кинотеатры бинасында урнашкан ветераннар клубы, Сарман авыл җирлеге башкарма комитеты, “Бердәм Россия” сәяси партиясе җирле бүлеге, үзәкләштерелгән бухгалтерия һ.б., шулай ук, күп функцияле үзәк дип атап була, дип белдерде И.Халиков. Кунак биредә Бөек Ватан сугышы һәм туган якны өйрәнү музееның күчмә экспозициясе белән танышты, ветераннар белән аралашты.

Район советы утырышында ТР Премьер-министрыннан тыш, ТР Югары суды рәисе Илгиз Гыйлаҗев, ТР Президенты Аппараты җитәкчесе урынбасары - ТР Президентының Территорияләр белән эшләү идарәсе җитәкчесе Илнур Гарипов, ТР Муниципаль берәмлекләр советы рәисе Миңсәгыйть Шакиров, Президент Аппараты, Министрлар Кабинеты, ТР суд органнары, “Татнефть” ААҖ, учреждение, предприятие һәм иҗтимагый оешмалар вәкилләре катнашты.

Утырышта муниципаль район башлыгы Нәфис Закиров, муниципаль берәмлекнең 2013 ел социаль-икътисади үсеше нәтиҗәләренә һәм 2014 ел бурычлары турындагы доклад белән чыгыш ясады.

Илдар Халиков, узган 2013 ел республика тарихына Универсиада елы буларак керүен билгеләп үтте һәм ил җитәкчелеге белән Халыкара студентлар спорты федерациясе тарафыннан башка Универсиадалардан иң яхшысы булып танылуын искәртте һәм аңа әзерлек һәм үткәрүдә ярдәм итүләре өчен рәхмәт белдерде.

“Авылларга һәм авыл җирлекләренә күрсәтелә торган ярдәм социаль-икътисади гына түгел, ә мәдәни, сәяси күрсәткеч тә. Соңгы вакытта гамәлгә куела торган ФАПлар, клублар төзелеше, “Чиста су” кебек программалар беркайчан да булганы юк иде, - дип дәвам итте сүзен Премьер. - Алар сездә дә гамәлгә ашырыла. Авыл хуҗалыгы җитештерүчеләре генә дә Россия Федерациясе һәм республика бюджетыннан 350 млн сум күләмендә ярдәм алды. Республикада барлык кырларның 2,9 проценты район өлешенә туры килә. Димәк, авыл хуҗалыгында резервлар бар әле. Терлекләр баш саны кимемәгән, ә сөт җитештерү күләме кимү тауар җитештерүчеләрне борчырга тиеш, чөнки сөт бәясе түбән түгел”.

Республикада мәгариф һәм сәламәтлек саклау системалары өстенлекле булып калуын дәвам итә. Узган ел “Киләчәк” программасын гамәлгә ашыруга 2 млрд сумнан артык акча юнәлдерелгән. 2013 елда укытучыларның уртача хезмәт хакы 26287 сум тәшкил иткән. Быел 164 мәктәп модернизацияләнә, 170 мәктәптә 2 млрд сумнан артык бәягә капиталь ремонт башкарылачак. Ремонт программасына сезне районнан 2 мәктәп кертелгән. 2 ФАП төзелеше һәм 4 пунктны ремонтлау планлаштырыла. Алар квалификацияле белгечләр белән тәэмин ителергә һәм халыкка тиешле дәрәҗәдә хезмәт күрсәтергә тиеш. Республикада югары технология медицина үзәкләре бар, сезнең үзәк хастаханәдә ремонт үткәрелгән. Бу халык сәламәтлеген саклауда, үлем очракларын киметүдә уңай нәтиҗә бирергә тиеш. Шул сәбәпле, сезнең районда үлүчеләр саны туучылардан күп булуын аңлый алмыйм”, - диде И.Халиков.

“Бүген күп функцияле үзәктә, суд участоклары бинасында һәм кинотеатрда күргәннәр халык өчен яхшы шартлар тудырылуын дәлилли. Бу юнәлештә эшләүне дәвам итегез. Урамнарны яктырту, ветеринария пунктлар төзелеше, ятимнәрне торак белән тәэмин итү, арендага торак төзелеше кебек 2014 елгы программаларының күбесе 2013 ел ахырында ук гамәлгә куела башлады... Арендага торак төзелеше буенча үтенечегез аңлашыла. Җәлил бистәсен су белән тәэмин итү мәсьәләсен дә хәл итү зарур, юллар төзелеше буенча озак вакытлы программа формалаштырыла. Районда өлкән буын һәм яшьләр дә электрон элемтәдән файдалана. “Халык контроле” системасы буенча бенинди баш тарту очрагы да булмады. “Ачык Татарстан” яңа системасы кертелә. Әгәр сезнең районның сынау участогы буласы килә икән, без ярдәм итәбез”, - дип өстәде ТР Премьер-министры.

Илдар Халиков Сарманлыларга, Татарстанны социаль-икътисади күтәрүдә өлеш керткәннәре өчен, рәхмәт белдерде һәм аерым уңышларга ирешкән хезмәткәрләргә дәүләт бүләкләре тапшырды.