Алексей Песошин Татарстанның Алексеев районында булды

Бүген ТР Премьер-министры вазыйфаларын башкаручы Алексей Песошин республиканың Алексеев районында булды. Ул берничә объектны карады һәм район Советы утырышында катнашты.

Район үзәгендә А. Песошин хәрби-интернационалистларның сугышчан дан музеенда булды. Экскурсияне музейның җитәкчесе һәм оештыручысы Николай Гордеев уздырды.
А. Песошин шулай ук дәүләт һәм муниципаль хезмәтләр күрсәтү буенча күп функцияле үзәктә булды һәм аның клиентлары белән аралашты.

Аннан соң Алексей Песошин Алексеев муниципаль районы Советы сессиясендә катнашты. Районның социаль-икътисади үсеш нәтиҗәләре турында район башлыгы Владимир Козонков доклад ясады. Аның әйтүенчә, Алексеев районы өчен 2013 ел уңышлы узган. Тулай төбәк продукты 5 млрд 651 млн сум тәшкил иткән. Иң күп эшләр төзелеш тармагы тарафыннан башкарылган һәм 3,4 млрд. сум тәшкил иткән, хезмәт хаклары 23%ка арткан.

Соңгы елларда корылык булуга карамастан, Алексеев районы буенча тулай авыл хуҗалыгы продукциясенең бәясе 1 млрд. 871 млн. сум тәшкил иткән, узган ел белән чагыштырганда 15%ка арткан.

2013 елда Алексеев районында 14,3 мең кв. метр торак төзелә. “Социаль ипотека” һәм “Бөек Ватан сугышында катнашучыларны торак белән тәэмин итү” программасы буенча 5 күп фатирлы торак йорт төзелә һәм файдалануга тапшырыла.

2013 елда Алексеев районында демографик хәл буенча да уңай тенденция саклана.

Алексей Песошин район халкына 2013 елдагы уңышлы эшләре өчен рәхмәт белдерде һәм бүләкләр тапшырды.