А.Песошин: “Яңа Чишмә районы республикада лаеклы урын алып тора, ләкин тынычланырга кирәкми”

Бүген ТР Премьер-министры вазыйфаларын башкаручы Алексей Песошин Яңа Чишмә муниципаль районы Советы утырышында катнашты.

2013 нче елда районның социаль-икътисади үсешенә нәтиҗәләр һәм 2014 нче елга бурычлар турында Яңа Чишмә районы башлыгы Вячеслав Козлов чыгыш ясады. Ул билгеләп үткәнчә, 2013 нче елда районның тулай продукты 9,2 млрд.сум булган: үсеш - 1,4 процент.

Былтыр 11,28 млрд.сумлык товар озатылган. Район территориясендә 7 нефть компаниясе эшли, алар 1,15 млн. тоннадан артык нефть чыгарган.

Үткән елда район бюджетына 417,5 млн.сум килеп ирешкән, шул исәптән үз кереме - 178 млн.сум, бу үткән ел дәрәҗәсеннән 24 процентка күбрәк.

Шул ук вакытта бюджет структурасы үзенең социаль юнәлешен саклый, социаль өлкәне финанслауга тотылган чыгымнарның өлеше 77% тәшкил итә.

“Соңгы елларда кече һәм урта бизнесны, шәхси хуҗалыкларны үстерүгә аерым игътибар бирелә, - дип билгеләде Вячеслав Козлов. – Хуҗалык итүче структурада аның өлеше 53,6 процент булган, тулай продуктта өлеше - 16 процент (1,5 млрд. сум)”.

Бу өлкәдә 7200 икътисади актив кешенең 1190ы эшли, аларның уртача хезмәт хакы - 19,5 мең сум, дип хәбәр итте район башлыгы.

Халыкның тормыш сыйфаты турында сөйләгәндә, Вячеслав Козлов билгеләп үткәнчә, ел дәвамында бер кешегә уртача керем 9,5 процентка арткан һәм аена 11 мең 815 сум булган. Районда уртача хезмәт хакы 7,3 процентка арткан, 20 мең 365 сум булган, ә эре предприятиеләрдә - 22 мең 684 сум.

Авыл хуҗалыгында 1120 кеше эшли. Районда 2 агрофирма («Кулон» һәм «Татарстан») һәм 70 КФХ уңышлы эшчәнлек алып бара. Авыл хуҗалыгы оешмаларының елына акчалата кереме 651 млн. сум булган (583 мең сум бер хезмәткәргә), авыл халкының уртача хезмәт хакы - 10 мең 490 сум.

Вячеслав Козлов, төзелеш һәм капиталь ремонт өлкәсендә һ.б. районнарга ярдәм итү буенча программалар өчен, республика җитәкчелегенә рәхмәт белдерде.

“Үткән 2013 нче ел Казанда Универсиаданы уздыру белән истә калды, - дип билгеләде чыгышында ТР Премьер-министры вазыйфаларын башкаручы Алексей Песошин. – Объектларны әзерләүдә һәм яшьләр форумын уздыруда сезнең районның да өлеше бар, моның өчен сезгә зур рәхмәт”.

Алексей Песошин билгеләп үткәнчә, 2013 нче ел, тулаем алганда, республика өчен уңышлы булды. Ул сәнәгать үсеше, республикада тормышка ашырыла торган проектлар, программалар турында сөйләде.

“Республика ягыннан билгеләнгән программалар кысаларында ярдәм итү дәвам ителәчәк”, - дип ышандырды ул.

“Сезнең район ТРның муниципаль берәмлекләре рейтингында лаеклы 7 нче урынны алып тора, ләкин булганына канәгать булып, тынычланырга кирәкми, - дип ассызыклады Песошин. – Тагын да максатчан рәвештә кече һәм урта бизнесны үстерергә, “Лизинг-грант”, шәхси хуҗалыкларны һәм КФХ, гаилә фермаларын үстерү буенча программаларның мөмкинлекләрен, яшь белгечләрне җәлеп итеп, киңрәк кулланырга кирәк”, - диде ул.

Утырыш соңында Алексей Песошин Яңа Чишмә районында төрле тармакларда үзләрен күрсәткән аерым хезмәткәрләргә ТР Министрлар Кабинетының Рәхмәт хатларын тапшырды.