Ватаннан читтә хезмәт бурычын үтәгән Россиялеләрне Искә алу көне уңаеннан ТР Премьер-министры вазыйфаларын башкаручы Алексей Песошинның мөрәҗәгате

Ватаннан читтә хезмәт бурычын үтәгән Россиялеләрне Искә алу көне уңаеннан, ТР Премьер-министры вазыйфаларын башкаручы Алексей Песошин, локаль сугышларда һәм хәрби конфликтларда катнашучыларга мөрәҗәгать итте.
“Хөрмәтле локаль сугышлар һәм хәрби конфликтларда катнашучылар! - диелә мөрәҗәгать текстында. – 15 нче февральдә безнең ил Ватаннан читтә хезмәт бурычын үтәгән Россиялеләрне Искә алу көнен бәйрәм итә. Без аларны хәтерлибез һәм хөрмәтлибез, төрле елларда чит илләрдә хезмәт бурычы буенча хәрби конфликларны җайга салуда катнашкан улларыбыз һәм кызларыбызны хөрмәтлибез. Бу сугышлар һәм конфликтлар йөз меңләгән кешеләрнең тормышларына тәэсир итте, күпләре өйләренә, гаиләләренә, аналары, хатыннары, кәләшләре янына әйләнеп кайтмады. Миллион ярымнан артык ватандашларыбыз илебез читендә 30 сугышта һәм хәрби бәрелештә катнаштылар. Совет солдатлары һәм офицерлары Корея һәм Вьетнамда, Сирия һәм Мисырда, Мозамбик һәм Анголада, Алжир һәм Эфиопиядә һәм башка илләрдә сугыштылар. Алар, тугандаш халыкларга якты киләчәк өчен көрәшергә ярдәм итәбез, дигән ышаныч белән, батырларча сугыштылар. Россиянең хәрби хезмәткәрләре Югославиядә тынычлыкны яклап көрәштеләр һәм Көньяк Осетия халкын геноцидтан коткардылар.
Бүген 40 нчы армия частьләренең соңгы колонналары һәм чик буе гаскәрләренең барлык махсус бүлекчәләре Әфганстан республикасыннан чыкканга 25 ел була. Совет сугышчыларының геройлыгы, батырлыгы һәм намуслылыгын күпне кичергән Әфган җире әле һаман да хәтерли. Ул сугышта 9750 Татарстанлы катнашты, шуларның 261е һәлак булды, 2121 кеше орденнар һәм медальләр белән бүләкләнде. Әфганстан Республикасында хезмәт бурычын үтәгәндә күрсәткән батырлык өчен, безнең якташыбыз Дауди Ильяс Дилшат улы “Россия Федерациясе Герое” исеменә лаек булды. Чит илдә хезмәт бурычын үтәгәндә барлыгы 25 мең ватандашыбыз һәлак булды. Алар хәрби антны намус белән үтәгәндә үзләрен корбан итте.
Әфганстанда һәм Ватаннан читтә булган башка “кайнар нокталарда” һәлак булганнарның бартырлыгы алдында баш иеп, без хәрби хәрәкәтләрдә катнашып, хәзерге вакытта исән булучыларның һәм һәлак булганнарның гаиләләре турында онытмыйбыз.
Сугышчы-интернационалистларның уникаль тәҗрибәсе – Кораллы Көчләрдә, хокук тәртибе органнарында, дәүләт һәм иҗтимагый оешмаларда, шул исәптән яшьләрне патриотизм, гражданлык, Ватанга намуслы хезмәт итү рухында тәрбияләү буенча җаваплы эшләрдә бүген дә кирәк.
Кадерле дуслар, бу истәлекле көндә чын күңелдән нык сәламәтлек, тынычлык, бәхет һәм иминлек телим!
ТР Премьер-министры вазыйфаларын башкаручы Песошин А.В.".