Яшел Үзәннең Горький исемендәге заводында яңа линия файдалануга тапшырылды

Яшел Үзәннең Горький исемендәге заводында бүген салкын-ката торган катнашмалар линиясен файдалануга тапшыру тантанасы булды.
Бу чарада ТР Премьер-министры Илдар Халиков, Россиянең Хәрби-диңгез флоты баш командующие Виктор Чирков, РФ Оборона министрлыгы, Татарстан министрлыклары һәм ведомстволары, Яшел Үзән муниципаль районы хакимияте һәм “Ак Барс” холдинг компаниясе” ААҖ вәкилләре катнашты.

Яңа линия корыч, чуен һәм башка эретмәләрдән эшләнмәләр әзерләү өчен булдырылган. Ул Германиянең "FAT" компаниясе тарафыннан завод таләпләрен исәпкә алып, индивидуаль заказ буенча эшләнгән.

“Горький исемендәге Яшел Үзән заводы” ААҖ генераль директоры Ренат Мистахов, линияне эшләтеп җибәрү тантанасында, предприятиедә җитештерү егәрлекләрен техник яктан яңадан җиһазлау программасы гамәлгә ашырыла, дип искә алды. Хәзерге вакытта предприятиедә модернизацияләүнең мөһим һәм үзгәрешле этабы бара. Аерым алганда, кою производствосы тулысынча үзгәртелде, ул корычны гына түгел , ә төсле һәм кара металларны да кою мөмкинлеге бирә. Бүген файдалануга тапшырылган яңа линиядә кара һәм төсле коелмалардан продукция әзерләүнең барлык процессы берләштерелгән.

Үз чиратында, Илдар Халиков заводта узган бүгенге чараны тарихи вакыйга, дип атады. Завод иң заманча металлургия производствосын эшләтеп җибәрде, ә бу продукциянең сыйфатын тәэмин итә, диде ул.

Виктор Чирков шулай ук оборона комплексындагы предприятиеләрдә модернизацияләү процессының мөһимлеген билгеләде, бүген безнең илебезгә заманча корабльләр кирәк, диде ул.