Казанда “Ел хатын-кызы. Ел ир-егете: хатын-кыз карашы” шәһәр конкурсы җиңүчеләрен бүләкләделәр

Бүген Казан ратушасында “Ел хатын-кызы. Ел ир-егете: хатын-кыз карашы” шәһәркүләм конкурсы нәтиҗәләре игълан ителде, башкалада җәмгыятькә һәм шәһәр тормышына зур файда китергән дип табылган төрле һөнәр һәм вазифа иясе булган 14 Казанлыга дәүләт бүләкләре тапшырылды.

Аерым алганда, ТР Президенты Рөстәм Миңнеханов Указы белән 5 шәхес - Казанның аерым предметларны тирәнтен өйрәнүле 55 нче урта гомумбелем бирү мәктәбенең тарих укытучысы Роза Горнаева “Фидакарь хезмәт өчен” медале белән бүләкләнде, калганнарына мактаулы исем атрибутлары бирелде, ТР Президентының Рәхмәте игълан ителде. Шулай ук ТР Премьер-министры Рәхмәтенә 3, муниципаль бүләкләрдән Казанның Мактау грамотасына 6 хатын-кыз лаек булды. Дәүләт бүләкләрен исә ТР Премьер-министры Илдар Халиков зур канәгатьлек белән тапшырды.

Шушы мәртәбәле тантананы ачып, Татарстан Хөкүмәте башлыгы И.Халиков Казанның гүзәл затларын Татарстан Республикасы Президенты Рөстәм Миңнеханов һәм шәхсән үз исеменнән якынлашып килгән Халыкара хатын-кызлар көне белән котлады. Хатын-кызларның гаиләдә, җәмгыятьтә, гомумән, кешелек дөньясында тоткан роле зур һәм җаваплы булуын ассызыклап әйтте. Сез - балалар тәрбияләүче, гомерегез буе без-ирләрнең гомер юлдашы, таянычы, һәм сезгә хатын-кыз, гаилә бәхете, балаларыгыз, оныкларыгыз игелеген телибез, диде. Бер дигән педагоглар, табиблар, фән баскычларыннан күтәрелүчеләр, кирәк икән - төзүчеләр, транспортчылар,.. – хатын-кызлар генетикасы шундый үзгә инде ул, дип, И.Халиков үзләренең хезмәтләре белән Казанда 2013 ел өчен үтә зур вакыйгаи бәйрәмне – XXVII Универсиаданы “ясаучылар”га рәхмәт әйтте.

Казанлыларны хөрмәтләү тантанасында башкала мэрының беренче урынбасары Оскар Прокофьев та катнашты.
Аннары үзләренең эшлекле сыйфатларын, иҗади куәтен җәмгыяви тормышта – гаиләдә, бизнеста, мәдәнияттә, сәламәтлек сагында, производствода, дәүләт идарәсендә уңышлы итеп файдаланган хәзерге заман хатын-кызының һәм ир-егетенең уңай образын булдыруны максат итеп үткәрелә килгән “Ел хатын-кызы. Ел ир-егете: хатын-кыз карашы” шәһәркүләм конкурсы 10 номинациядә бәяләнгәне искәртелде. Җыеп кына әйткәндә, конкурс җиңүчеләре 23 кеше булып, шуларның 3се – ир-егет. Номинантлар турында ратушаның күркәм залы түрендәге зур экраннарда видеороликлар мәгълүмат-белешмә бирелеп барды.
“Аерым танылу – Универсиада хатын-кызлары” номинациясендә җәмгысе 10 ханым бүләкләнде.

“Хатын-кыз – ана” номинациясендә 5әр бала анасы булган пенсиядәге Резидә Гарәфетдинова белән Валерия Васикова хөрмәтләнде.

“Хатын-кыз – мәдәният һәм рухилык” дип аталганында “Ядәм” мәчете карамагындагы сукырлар өчен укыту-тернәкләндерү үзәге директоры Эльмира Гыйльметдинова – Мәликә ханымга аерым хөрмәт күрсәтелде.

“Хатын-кыз – галимә” номинациясендә КДМУ профессоры Фәридә Вәлиева белән КФУ доценты Кадрия Фәтхуллова җиңүче дип танылды.

“Минем язмышым – минем һөнәрем” дигәнендә исә “Казанская ТЭЦ-3”нең химия цехы башлыгы Ираида Миронова, “Казметрострой” МУП участок маркшейдеры Надежда Головинская, “Хатын-кыз – бизнес-леди” “Ривьера” ҖЧҖ коммерция директоры Елена Войтко, өлкәннәргә каралган “Героиня третьего возраста” номинациясендә “ЖЭУ-12” ҖЧҖ ишегалды себерүчесе Елена Кутузова (ул 1945 елгы) бүләкләнде.

“Хатын-кыз – ел үрнәге” номинациясендә ТР Инвалидларның физкультура-спорт җәмгыяте рәисе Фәридә Сафиуллина җиңүче булды.
Шул рәвешле, 8 номинация гүзәл затларга каралган иде.

“Ир-егет - мәрхәмәтле йөрәк” номинациясендә җиңүче исеменә исә “Зарница” җитештерү берләшмәсе директоры Артур Абдулҗанов лаек дип табылды, “Ир-егет - лидер” дип аталганында – 7 нче шәһәр хастаханәсе баш табибы Марат Садыйков һәм “ПАТП №2” МУП директоры, шәһәр Думасы депутаты Альберт Мөхәммәтшин.

Бүләкләү тантанасы башкала сәнгать осталарының концерт программасы белән үрелеп барды. Соңыннан мөхтәрәм кунаклар фуршетка чакырылды.