Быел республиканың 42 муниципаль берәмлегендә 216 торак пунктның су басу зонасына эләгүе ихтимал

Татарстанда язгы ташу белән бәйле вәзгыять кискенләшкән очракта, су басу зонасына республиканың 42 муниципаль берәмлегендә 216 торак пункт эләгүе ихтимал. Бүген бу хакта ТР Хөкүмәте йортында язгы ташу белән бәйле рәвештә мөмкин булган гадәттән тыш хәлләрне булдырмау буенча чаралар күрү һәм язгы бозның куркынычлылыгы турындагы темага багышланган брифингта билгеле булды.
Су басу куркынычы янаган 42 муниципаль берәмлектә 6 мең 910 торак йорт урнашкан, анда 18 мең 846 кеше гомер кичерә.
Моннан тыш, су басу зонасына 75,3 км автомобиль юлы, 26 автомобиль күпере, 48 социаль әһәмияткә ия объект, 27 икътисад объекты эләгергә мөмкин. Нефть-, газүткәргечләр, шулай ук үләт базларына су басу куркыныч янамый.

Быел Татарстандагы торак пунктларны су басу рисклары фаразы Россия Гидрометцентры, Гидрометеорология һәм әйләнә-тирә мохитне мониторинглау идарәсе, “РусГидро” ААҖ, “Антистихия” үзәге мәгълүматларына нигезләнеп эшләнгән.

ТР гражданнар оборонасы һәм гадәттән тыш хәлләр министры урынбасары Николай Суржко әйтүенчә, агымдагы елда язгы ташу, көзен туфракның дымлылыгы һәм кар запаслары буенча күпъеллык уртача күрсәткечләрнең артып китүе, шулай ук соңрак уртача тәүлеклек югары һава температуралары күзәтелүе белән аңлатыла.

Агымдагы елда Идел, Зөя, Казансу, Нократ, Минзәлә, Ык, Мишә, Сөн, Кече Чирмешән елгаларында язгы ташу көчле булыр дип фаразлана.
“Белгечләр тарафыннан гидротехник корылмаларның куркынычсыз эксплуатациясе мәсьәләләренә аеруча зур игътибар бирелә. Хәзерге вакытта ТР Гадәттән тыш хәлләр министрлыгы һәм Россия экологик, технологик һәм атом күзәтчелеге федераль хезмәте Идел буе идарәсенең уртак фәрманы нигезендә, буаларның 120 гидротехник корылмасында комиссия тикшерүләре алып барыла”, - дип белдерде Николай Суржко. Аның сүзләренә караганда, бүгенге көндә ресупбликада төрле сәбәпләр аркасында 199 буа бушатылмаган, алар арасында 23е 1 млн кубометр күләмгә ия. Республика территориясендә кар запаслары югары булуын күздә тотып, бу, гидротехник корылмаларда гадәттән тыш хәлләр барлыкка килүгә алшартлар тудыра.

Николай Суржко әйтүенчә, республиканың 12 районыннан бозны кузгату өчен шартлату эшләрен башкаруга заявкалар кабул ителгән. Кече елгаларның боз тыгылу куркынычы булган 23 участогында, 15 күпер аркылы чыгу урыны алдыннан шартлату эшләрен уздыру планлаштырылган. Башлыча Шушма, Сөн, Мишә, Минзәлә, Зөя елгаларында үткәреләчәк әлеге эшләргә 20 нче марттан тотыну ниятләнә.

Николай Суржко чираттагы язгы ташуга әзерлек барышында, гидротехник корылмаларны төзекләндерү, елга юлларын чистарту һәм тирәнәйтү, ярларны ныгуту, суүткәргеч торбаларны чистарту һәм төзекләндерү буенча чаралар башкарылганын искәртеп үтте. Язгы ташуга әзерлек чараларын финанслауга килгәндә, министр урынбасары хәбәр иткәнчә, гидротехник корылмаларны ремонтлау, елга юлларын чистарту һәм тирәнәйтү буенча эшләрне финанслау күләме арткан. Узган ел белән чагыштырганда, автомобиль юлларында суүткәргеч торбаларны ремонтлау һәм урнаштыруга финанслау артан. Ә ярларны ныгыту эшләренә исә, финанслау күләмнәре кисәк кимегән.

Республика территориясендә кар эрү процессы җанлы барганлыктан, 199 посттан гыйбарәт булган вакытлыча күзәтү челтәре төзелгән, шул исәптән, 55 – кече елгаларның боз тыгылу участокларында һәм 144 – потенциаль куркыныч һәм аварияле халәттәге буаларда.