Татарстан Республикасында исемлеккә кергән 80%тан артык күп балалы гаиләләр җир кишәрлекләре белән тәэмин ителгән

Татарстан Республикасында 2014 елның 29 март мәгълүматлары буенча җир кишәрлекләре алу исемлегенә 25 меңнән артык күп балалы гаилә кертелгән. Бу хакта бүген ТР Хөкүмәте Йортында узган республика киңәшмшсендә ТР җир һәм милек мөнәсәбәтләре министры Азат Хамаев хәбәр итте.
Киңәшмә барлык муниципаль районнар белән видеоконференцэлемтә режимында үтте, аны ТР Премьер-министры Илдар Халиков уздырды.

Азат Хамаев сүзләренчә, 20 меңнән артык күп балалы гаилә җир кишәрлекләрен алган инде, шул исәптән 2014 елның гыйнвар-март айларында 741 кишәрлек бирелгән.

Гомумән республикада исемлеккә кертелгән 80% тан артык күп балалы гаилә җир кишәрлекләре белән тәэмин ителгән.

Татарстан башкаласына килгәндә, монда җир кишәрлеге алу исемлегенә 5294 күп балалы гаилә кертелгән. Шуларның 2077сенә җир кишәрлекләре бирелгән инде.

Чаллы шәһәре буенча исемлеккә 3083 күп балалы гаилә кертелгән, шуларның 2324 нә җир кишәрлекләре бирелгән инде.