Казанда Россия ватандашларының Халыкара яшьләр форумы узды

Бүген Казанда Россия ватандашларының Халыкара яшьләр форумы үзенең эшен башлап җибәрде. Форумның ачылышында Татарстан Премьер-министры Илдар Халиков, БДБ, чит илләрдә яшәүче ватандашлар эшләре буенча һәм халыкара гуманитар хезмәттәшлек буенча федераль агентлык җитәкчесе Константин Косачев, РФ Тышкы эшләр министрлыгының чит илләрдәге ватандашлар белән эшләү буенча департамент директоры Анатолий Макаров, ТР Вице-премьеры Юрий Камалтынов катнашты.

Чит илләрдә яшәүче Россия ватандашларының “Яшьләр, фән, инновацияләр” Халыкара яшьләр форумы Казанда 21 апрельдән 24нә кадәр узачак. Форум эшендә 45тән артык илдән 120 вәкил катнаша (Абхазия, Әзербайҗан, Әрмәнстан, Белоруссия, Казакъстан, Кыргызстан, Латвия, Литва, Молдавия, Таҗикстан, Үзбәкстан, Украина, Эстония, Көньяк Осетия, Австралия, Австрия, Алжир, Аргентина, Бельгия, Болгария, Бразилия, Бөекбритания, Израиль, Ирландия, Испания, Италия, Канада, Коста-Рика, Куба, Люксембург, Македония, Марокко, Нидерланд, Яңа Зеландия, Норвегия, Берләшкән Гарәп Әмирлекләре, Польша, Португалия, Сербия, АКШ, Төркия, Франция, Германия, Чехия, Чили).

Форумда РФ Тышкы эшләр министрлыгыннан, Яшьләр эшләре буенча федераль агентлыктан, Татарстан Республикасы Хөкүмәтеннән дәрәҗәле кунаклар, шулай ук фәнни экспертлар, Татарстанның югары уку йортлары һәм инновацион предприятиеләре вәкилләре катнаша.

Форумны оештыручылар – РФ Тышкы эшләр министрлыгы һәм Татарстан Республикасы Хөкүмәте.

Бүген форумның ачылышында анда катнашучыларны һәм кунакларны Анатолий Макаров сәламләде. Ул РФ тышкы эшләр министры Сергей Лавровның сәламен җиткерде.

Илдар Халиков шулай ук республика җитәкчелеге исеменнән форумда катнашучыларны сәламләде. Ул форумның Казанда узуы өчен РФ Тышкы эшләр министрлыгына рәхмәт белдерде. “Татарстан өчен форумның хәзерге темасы бик үзенчәлекле. Республикага нәкъ менә яшьләргә йөз тоту хас. Ә безнең чит илләрдә яшәүче бүгенге кунакларыбыз, республика белән күп юнәлешләр буенча элемтә тоту мөмкинлекләренә ия, һәм без моны хуплыйбыз”, дип белдерде Илдар Халиков.
ТР Премьер-министры Татарстанның икътисад, инновацияләр, спорт, фән һәм мәгариф өлкәләрендәге казанышлары турында сөйләде. Ул форумда катнашучыларга, аларның Казанга килүләре файдалы һәм кызыклы булуын теләде.

Константин Косачев шулай ук форумны оештыручыларга рәхмәт белдерде һәм форумның актуаль проблематикасын билгеләп үтте. Аның сүзләренчә, соңгы елларда күп белгечләр яңадан үз иллләренә әйләнеп кайталар һәм яңа бизнес булдыралар һәм яңа технологияләр кертәләр.

Бүген форум кысаларында берничә дискуссия узачак. Анда катнашучылар Казанның ИТ-паркында булачаклар.