Илдар Халиков Татарстанның ике районында язгы-кыр эшләренең барышы белән танышты

Бүген Татарстан Республикасы Премьер-министры Илдар Халиков республиканың Кама Тамагы һәм Тәтеш муниципаль районнарында язгы-кыр эшләренең барышы белән танышты. Татарстан Хөкүмәте башлыгын ТР вице-премьеры – ТР авыл хуҗалыгы һәм азык-төлек министры Марат Әхмәтов озата йөрде.

Илдар Халиков хуҗалыкларның чәчү бара торган кырларын карады, шулай ук ике районда да авыл хуҗалыгы предприятиеләре җитәкчеләре белән киңәшмә уздырды.

Кама Тамагы районының агросәнәгать активы белән очрашу Олы Шәмәк авылы янындагы “Содружество” хуҗалыгы кырларында булды. Бу авыл хуҗалыгы предприятиесе “Ак Барс Агро” холдинг структурасына керә һәм районда иң зурлардан санала. Хуҗалыкның сөрүлек җирләренең гомуми мәйданы 19 мең гектар тәшкил итә.

Тәтеш районы буенча чәчүлекләрнең гомуми мәйданы 83 мең гектардан артык тәшкил итә. Чәчүлек мәйданының 65 %ында бөртекле культуралар, 4,4 %ында шикәр чөгендере, 5,8%ында рапс, 24,3%ында терлек азыгы культуралары чәчелгән.

Бүгенге көнгә Тәтеш районында язгы бөртекле культуралар чәчү 42%ка төгәлләнгән. Район башлыгы Валерий Чершинцев сүзләренчә, чәчүне 9 майга тәмамлау планлаштырыла.

Марат Әхмәтов Тәтешлеләрнең терлекчелектәге уңышларын да билгеләп үтте. Аның сүзләренчә, Тәтеш районы сөт җитештерүдә 2009 елдагы дәрәҗәгә ирешә алган.

“Без караган районнар яхшы нәтиҗәләр күрсәтә. Һава шартлары һәм эшнең яхшы оештырылуы язгы-кыр эшләрен тиз арада төгәлләргә мөмкинлек бирер, дип ышанабыз”, -диде Илдар Халиков.

Марат Әхмәтов сүзләренчә, гомумән республикада язгы-кыр эшләре оешкан төстә һәм яхшы темпта бара, Татарстанда чәчүне 7-10 көн эчендә тәмамлау планлаштырыла.