ТР урман хуҗалыгы министрлыгы башлыгы Наил Мәһдиев: “Без янмасак, бар да яхшы дигән сүз түгел әле”

Бүген Татарстанның Министрлар кабинетында ТР урман хуҗалыгы министры катнашында урман янгыннарын булдырмау һәм сүндерү өчен нинди эшләр башкарылуына багышланган брифинг үтте.

Россия Федерациясендә урман янгыннары буенча хәлләр шәптән түгел. Быел 13 май белешмәләре буенча, Россия урманнарында барлыгы 6658 янгын чыгып, 729 мең гектар урман янган - бу Татарстан урманнарының яртысы кадәр дигән сүз. Узган ел Россия урманнарында 2150 янгын чыгып, 2 мең гектар урман янган. Бер ел эчендә янгын чыгу очраклары 3 тапкырдан да артып киткән.

“Әгәр безнең урманнар янмый икән, әле бар да яхшы дигән сүз түгел. Башкортстан Республикасы, Киров, Ульяновск, Түбән Новгород өлкәләре һәм Пермь крае урманнары яна. Башкортстанда бүген дә бер янгын чыккан.

2010 елда Татарстан урманнарында 99 янгын чыгып, 168 гектар янган булса, соңгы 3 елда республикабыз урманнарында янгын очраклары теркәлмәгән. Әмма урман янгыннарының циклик булуы билгеле. Һәр 4 ел саен урман янгыннарының күбәю очрагы теркәлгән. 2002 елда, мисал өчен, урманда 65 янгын очрагы булган. Аннары янгыннар саны әзәйгән. 2006, 2010 елларда урман янгыннары кабат артуы сизелә. Хәзер 2014 ел һәм узган еллардагы янгын очракларын кабатламаска кирәк”, - диде ТР урман хуҗалыгы министры Наил Мәһдиев.

Татарстанда җылы һава торышы саклана. Алдагы көннәрдә республикада һава температурасы нормадан 9-10 градуска югарырак булачак. Бу исә урман янгыннары артуга сәбәп булып торырга мөмкин. “Урман янгыннарын булдырмау һәм сүндерү буенча бик күп эшләр башкарылды. 15 апрельдән ТР Министрлар кабинеты тарафыннан янгынга кары махсус режим урнашытырылды. Күрше республикалар Урман хуҗалыгы министрлыклары белән дә килешүләр төзелде. 2010 елда Казанның төтенгә буылганын хәтерлисездер. Ул вакытта төтен Марий Эль Республикасы урманнары яну сәбәпле таралды. Шул еллар тәҗрибәсе буенча, Удмуртия, Башкортстан, Чувашия республикалары, Киров, Ульяновск, Самара өлкәләре Урман хуҗалыгы министрлыклары белән янгыннарны булдырмау һәм сүндерү буенча килешүләргә кул куелды”, - диде министр.


Урман янгыннарын булдырмау һәм сүндерү өстендә эшләүче 918 хезмәткәр махсус өйрәнү узуы хакында да искәртте республиканың урман хуҗалыгы министры. Быел барлыгы 317 җәяүле патруль маршруты төзелгән һәм 3 авиа патруль оештырылган. Янгын сүндерүче 150 мобиль төркем булдырылган.

”Янгыннар бик җайсыз урыннарда да чыгарга мөмкин. Әмма урман янгыннарын сүндерүчеләр техник яктан да гадәттән тыш хәлләргә тулысынча әзер”, - дип ышандыра министр М.Мәһдиев.

Болар өчен федераль бюджеттан да, республика бюджетыннан да ТР Урман хуҗалыгы министрлыгына 35,7 миллион сум күләмендә акча бүлеп бирелгән. Соңгы 3 елда янгыннар чыкмау сәбәпле, ул акчалар тотылмаган, диде ул.