Татарстанга Кырым Республикасының Бакчасарай районы хакимияте башлыгы Ильми Умеров килде

Татарстанга Кырым Республикасының Бакчасарай районы хакимияте башлыгы Ильми Умеров эшлекле очрашуга килде.

Кырым Республикасының Бакчасарай районы делегациясе әгъзалары Татарстан Республикасы Премьер-министры Илдар Халиков белән очраштылар. Очрашу ТР Хөкүмәте йортында узды, Татарстан ягыннан анда ТР Премьер-министры урынбасары – ТР Министрлар кабинеты җитәкчесе Шамил Гафаров, ТР Премьер-министрының тышкы икътисади эшчәнлек буенча ярдәмчесе Назил Насыйбуллин катнашты.

Илдар Халиков һәм Ильми Умеров киләчәктә хезмәттәшлек мәсьәләләре, уртак проектлар өстендә эшләү буенча фикер алыштылар.

Бүген Кырымда катлаулы процесслар бара, болар оештыру характерындагы һәм закондагы үзгәреш мәсьәләләре, дип белдерде Илдар Халиков. Ул шулай ук Кырымга, Россиядә гамәлгә ашырыла торган барлык федераль программаларның таратылуын ассызыклады.
ТР Премьер-министры Кырымда Татарстан Президенты Рөстәм Миңнехановның күп тапкырлар булуын искә төшерде.

Яз көне Кырымда “Татнефть” ААҖ, “КАМАЗ”ААҖ һәм башка сәнәгать предприятиеләре вәкилләре булды, һәм шулай ук ТР министрлыклары һәм ведомстволары вәкилләренең эшлекле очрашулары оештырылды, Кырым Республикасында Татарстан вәкиллеген оештыру буенча эш алып барыла.

Киләчәктә мәгариф өлкәсендәге мәсьәләләр турында , шул исәптән Татарстан югары уку йортларына Кырымнан абитуриентлар кабул итү буенча фикер алышулар планлаштырыла.