Илдар Халиков “Йолдызлык” фестивале җиңүчеләрен бүләкләде

Татарстан премьер-министры Илдар Халиков бүген эстрада сәнгатенең “Йолдызлык – 2014” ачык республика телевизион фестивале җиңүчеләренә махсус дәүләт стипендияләрен тапшырды. Бу тантана ТР Хөкүмәте йортында узды.

Традиция буенча махсус дәүләт стипендиясе фестивальдә “вокал”, “вокал ансамбльләр”, “хореография”, “конферанс” номинацияләрендә беренче урынны алучыларга бирелә. Быел барлыгы 35 призлы урын каралган.

Фестивальдә җиңүчеләрне сәламләп, Илдар Халиков аларны Татарстан Президенты Рөстәм Миңнеханов исеменнән котлады. ТР Премьер-министры искә төшергәнчә, 14 ел эчендә барлыгы 700 меңнән артык бала “Йолдызлык” мәктәбен узган, фестиваль Татарстан, Россия чикләрен узып, бөтен дөньга мәгълүм булды. Быел фестивальдә бөтен республика буенча 70 мең бала катнашты.

Илдар Халиков сәнгать җитәкчеләренә, укытучыларга, барлык командага рәхмәт белдерде. “Бары тик команда гына мондый проектларны эшли һәм күп еллар дәвамында гамәлгә ашыра ала”, -дип ассызыклады ул.

Илдар Халиков җиңүчеләргә стипендияләр тапшырды. Тантана коллектив белән бергә фотога төшү белән тәмамланды.