Татарстанның 13 пляжы гына ачылырга рөхсәт алган

Россия Гражданнар оборонасы эшләре һәм гадәттән тыш хәлләр министрлыгының ТРда кече суднолар буенча дәүләт инспекциясе идарәсенең бүлек җитәкчесе Илһам Насыйбуллин хәбәр иткәнчә, 2нче июньгә кадәр Татарстанның 23 пляжында техник тикшерү булган. Шуның нәтиҗәсендә, бары 13 пляж гына файдаланылышка яраклы дип табылган.

“Тәҗрибә күрсәткәнчә, пляжларның күбесендә елга төпләре водолазлар тарафыннан тикшерелмәгән, профилактик стендлар, коткару постлары урнаштырылмаган, йөзеп керергә яраклы чикләр билгеләнмәгән була”, - диде И. Насыйбуллин.

Ул шулай ук кайбер муниципаль районнарда су буйларында пляжлар бөтенләй дә булдырылмавына игътибарны юнәлтте. “Татарстанның Югары Ослан, Кама Тамагы районнарында бер генә су буе да халык ял итәр өчен җайлаштырылмаган, Зәй районында да шул ук хәл. Зәйнең 2нче номерлы су саклагыч каналы кеше тормышы өчен аеруча куркыныч тудыра: анда һәр ел саен бәхетсезлек очраклары теркәлә”, - диде Илһам Насыйбуллин.

Спас муниципаль берәмлегендә дә рөхсәт ителгән пляжлар юк. Болгар шәһәренең Идел буенда урнашкан пляжы, Мочилище күле, Ржавец бистәсендәге су буена җәй айларында көн дә 100-300 кеше ял итүенә карамастан, җирле муниципаль берәмлек җитәкчеләре бу мәсьәләне игътибарсыз калдыра бирә, дип хәбәр итте И. Насыйбуллин.