Россия мәдәният министры Владимир Мединский Чистайда булды

Бүген Россия мәдәният министры Владимир Мединский һәм ТР Премьер-министры Илдар Халиков Чистай шәһәренең мәдәни-тарихи объектларын карады.

Шәһәр буйлап экскурсия Никольский соборыннан башланды, соңыннан кунаклар Чистай районы башлыгы Илдус Әхмәтҗанов белән бергә шәһәр тарихы музеенда, педагогия көллиятендә, Л. Леонов-Сельвинский Мемориаль музее булачак объектта, Укытучы йорты әдәби-мемориаль музеенда булдылар. Моннан тыш, алар революция көрәшчеләре алееясында, “Мәңгелек ут” мемориалы янында, Мельников йортында, Скарятинский бакчасында булды. Экскурсия Борис Пастернак мемориаль музеенда тәмамланды.

Музей мөдире Любовь Демченко сөйләгәнчә, ул 1990 нчы елда – язучының тууына 100 ел булган көнне – ачылган. Б.Пастернак Чистайда якынча 2 ел булган. Пастернак яшәгән бүлмәдә барлык мебель, шулай ук шәхси әйберләрнең бер өлеше сакланган.

Чистай – уникаль шәһәр, дип саный Россия мәдәният министры Владимир Мединский. “Монда Бөек Ватан сугышы елларында иң яхшы совет язучылары яшәгән һәм эшләгән. Монда безнең әдәбиятның классикларына әйләнгән әсәрләр язылган, - дип билгеләде В. Мединский. – Шуның кадәр әдәбият генийларының бер гектар мәйданда җыелуын дөнья мәдәнияте әле белми. Мөгаен, моны Мәскәүдә Переделкино язучылар бистәсе һәм Лаврушинский тыкрыгындагы язучылар йорты белән чагыштырырга буладыр. Чистайның үзенчәлеге шунда да”.

В. Мединский фикеренчә, бу үзәкнең Россиядә, ә киләчәктә бөтен дөньяда билгеле булуы кирәк. Мәдәният министры Чистайның агарту функциясен башкара алуына игътибар итте: мондый туризм маршруты кунакларга төрле объектларны гына карарга түгел, ә уйланырга, тарихны искә алырга мөмкинлек бирәчәк.
“Артында Нобелев лауреаты утырган өстәлне, танылган совет язучылары күтәрелгән баскычны күргәч, ул тирән тәэсир тудыра”, - диде В. Мединский.

Ул билгеләп үткәнчә, республика җитәкчелегенең Чистайны торгызу планы бар. “Мәдәният министрлыгы белән багланыш ярдәм итә алыр иде дип уйлыйм”, - диде мәдәният министры.

Чистайның туризм үзәге булу өчен барысы да бар, дип саный ТР Премьер-министры Илдар Халиков. “Туризм инфраструктурасы әле аз үсеш алган булса да, соңгы ике елда туристлар һәм совет әдәбиятын яратучылар ягыннан Чистайга кызыксыну зур. Татарстан халкының һәм республика кунакларының тарих белән очрашу мөмкинлеге булсын өчен, без Пастернак музеен гына түгел, өяз шәһәре Музеен, Укытучы йортын да торгызачакбыз”, - дип вәгъдәләде ТР Хөкүмәте башлыгы.

Мемориаль музейда булганда Илдар Халиков һәм Владимир Мединский Б. Пастернак барельефына чәчәкләр куйдылар. Россия мәдәният министры музейның бәяләмәләр кенәгәсендә теләк язып калдырды: “Искиткеч Б.Пастернак йорт-музеена, бөек рус совет әдәбияты шәһәре-музее буларак, яңартылган Чистайның үзәгенә әйләнүен телим”.