Япониядә аммиак, метанол һәм гранулалы карбамид җитештерү комплексын (Менделеевск, Татарстан) төзү проекты буенча ниятләр турындагы Меморандумга кул куелды

Бүген, 12 нче майда, Токиода (Япония) “Үсеш тышкы икътисади эшчәнлек банкы” (Внешэкономбанк), Татарстан Республикасы Инвестиция-венчур фонды, “Аммоний” ААҖ, “Мицубиси Хэви Индастриз” һәм “Соджиц Корпорейшн” компанияләре (Япония) ниятләр турындагы Меморандумга кул куйдылар.
Документ Менделеевскида (Татарстан Республикасы) аммиак, метанол һәм гранулалы карбамид җитештерү буенча яңа интеграцияләнгән комплекс төзү проектын гамәлгә ашыру турында.
Проектны “Менделеевсказот” җаваплылыгы чикләнгән җәмгыятенең минераль ашламалар җитештерү заводы мәйданчыгында “Аммоний” ААҖ гамәлгә ашыра.
Ниятләр турындагы Меморандумга Внешэкономбанкның рәис урынбасары Анатолий Балло, “Аммоний” ААҖ генераль директоры Радий Вахитов, Татарстан Республикасы Премьер-министры – Татарстан Республикасы Инвестиция-венчур фондының химаячеләр советы рәисе Рөстәм Миңнеханов, “Мицубиси Хэви Индастриз” (Mitsubishi Heavy Industries) һәм “Соджиц Корпорейшн” (Sojitz Corporation) компанияләре җитәкчелеге вәкилләре кул куйды.
Тышкы икътисади эшчәнлек буенча Татарстан Премьер-министры ярдәмчесе Искәндәр Мөфлиханов хәбәр иткәнчә, кул кую процедурасы тәмамланганнан соң, Татарстан Республикасы Премьер-министры Рөстәм Миңнеханов “Russia Today” телеканалына интервью биргән.
Шуны да искәртик: 2008 елның декабрендә, Татарстан делегациясенең Япониягә эшлекле визиты кысаларында, шулай ук Менделеевскида аммиак, метанол һәм гранулалы карбамид җитештерү буенча яңа интеграцияләнгән комплекс төзүдә хезмәттәшлек итү мәсьәләләре турында фикер алышканнар иде.
(Декабрьдәге визит турында тулырак мәгълүматны http://prav.tatar.ru/rus/index.htm/news/25008.htm сылтамасы буенча кереп таба аласыз).

Белешмә өчен:
ВЭБ ның Россия Хөкүмәте рәисе Владимир Путин җитәкчелегендәге Күзәтүчәнлек советы 2008 елның 15 нче сентябрендә Менделеевскида (Татарстан Республикасы) аммиак, метанол һәм гранулалы карбамид җитештерү комплексын төзү проектына 350 млн. долларга кадәр акча бүлеп бирүне хуплады.
Проектның гомуми бәясе 972,7 млн. доллар тәшкил итә.
Проектны “Менделеевсказот” җаваплылыгы чикләнгән җәмгыятенең минераль ашламалар җитештерү заводы мәйданчыгында “Аммоний” ААҖ гамәлгә ашыра.
Ел саен Менделеевскидагы аммиак, метанол һәм гранулалы карбамид җитештерү комплексы 717 мең тонна аммиак, 230 мең тонна метанол, 717 мең тонна карбамид һәм 380 мең тонна аммиак селитрасы җитештерәчәк.
Проектның үз бәясен кире кайтару срогы – алты-җиде ел.
Проектның лицензиары - Haldor Topsoe (Дания), төзелеш буенча подрядчысы - Mitsubishi Heavy Industries (Япония).
Проектның координаторы итеп, Sojitz Corporation япон фирмасы сайланган, производствоны чимал белән тәэмин итү өчен газ китерүче – “Татгазинвест” ЯАҖ (“Газпром” ААҖ нең газ сату буенча региональ операторы).
Проектны финанслауга Япониянең Сумитомо банкын (Sumitomo Mitsui Banking Corporation - SMBC) җәлеп итү күздә тотыла.