ТР ЭЭМда беренче яртыеллыкка йомгак ясадылар

Бүген Эчке эшләр министрлыгы (ЭЭМ) коллегиясенең киңәйтелгән утырышында Татарстан Республикасы буенча ЭЭМда 2014 елның беренче яртыеллыгына йомгак ясадылар. Коллегия эшендә ТР Премьер-министры Илдар Халиков, Россия ЭЭМ Икътисади куркынычсызлык һәм коррупциягә каршы көрәш баш идарәсе башлыгының беренче урынбасары Виталий Скворцов, Татарстан Республикасы буенча баш федераль инспектор Ренат Тимерҗанов, Татарстан Республикасы прокуроры Илдус Нәфыйков, ТР ЭЭМның структур һәм территориаль бүлекләре җитәкчеләре катнашты.
Министрлыкның эш нәтиҗәләре турында Артем Хохорин доклад ясады. Ул белдергәнчә, ведомство үз алдына куелган бурычларны үтәгән.

ЭЭМ эшчәнлеге нәтиҗәләрен билгеләп, Илдар Халиков ирешелгәннәрдә тукталып калырга ярамый, дип белдерде. Тормыш хокук саклаучылар алдына, оператив һәм профессиональ рәвештә хәл итәргә кирәк булган яңа бурычлар куюын дәвам итә. Татарстан Хөкүмәте башлыгы республика ЭЭМ көчләренең киләчәктә дә халыкны һәм дәүләтне оешкан җинаятьчелектән, коррупциядән һәм экстремизмнан саклауга юнәлтелүенә ышаныч белдерде.

Чыгышын тәмамлап, Илдар Халиков республикада хокук тәртибен тәэмин итүгә зур өлеш керткән Татарстан ЭЭМ хезмәткәрләрен билгеләп үтте. “Татарстан Республикасы алдындагы казанышлар өчен” орденга Татарстан ЭЭМның полиция башлыгы урынбасары Андрей Демидов лаек булды. “Фидакарь хезмәт өчен” медале ТР ЭЭМ оешкан җинаятьчелеккә каршы көрәш бүлеге башлыгы Рөстәм Гарифуллинга тапшырылды. “ТР эчке эшләр органнарының атказанган хезмәткәре” мактаулы исеме ТР буенча ЭЭМ үзкуркынычсызлык оператив-эзләү часте башлыгы Марсель Гәлләмовка бүләкләнде. ТР Президентының Рәхмәте РФ ЭЭМ Түбән Кама районы буенча идарәсенең полиция башлыгы урынбасары Айнар Камаловка тапшырылды. “Хокук тәртибен ныгытуда казанышлар өчен” күкрәк билгесе Татарстан ЭЭМ Экстремизга каршы көрәш үзәге башлыгы урынбасары Алексей Гаринга бирелде.