Татарстан Премьер-министры Илдар Халиков “Чистай” индустриаль паркында яңа производстволарга символик нигез ташы салуда катнашты

“Чистай” индустриаль паркында бүген ике яңа проект төзелеше башланып китте: болар “Дельрус Чистай” компаниясенең медицина препаратлары заводының икенче чираты, шулай ук “Органик табигый продуктлар” (Израиль) компаниясенең “Агропарк” заводы. Ике проектка да инвестицияләр күләме 1,5 млрд. сум тәшкил итә.

Тантналы чарада Татарстан Премьер-министры Илдар Халиков, Чистай муниципаль район башлыгы Илдүс Әхмәтҗанов катнашты.

Беренче булып “Органик табигый продуктлар” Агропарк ҖЧҖ” проекты җибәрелде. Завод зәңгәр кыслалар (мини-лобстерлар) җитештерү белән шөгыльләнәчәк.
Илдүс Әхмәтҗанов сүзләренчә, “Органик табигый продуктлар” компаниясе “Чистай” индустриаль паркының беренче чит ил резиденты булды.

“Бу чынлап та әһәмиятле вакыйга. Билгеле, ул очраклы түгел. Бүген символик нигез ташын салу гына түгел, бүген - төзелешнең башлануы”, - дип билгеләде Илдар Халиков.

“Органик табигый продуктлар” ҖЧҖне оештыручы Михаэль Ирони Татарстан Республикасы һәм Чистай районы җитәкчелегенә завод төзелешенә ярдәм иткән өчен рәхмәт белдерде.

Завод төзелешенә планлаштырылган инвестициянең күләме якынча 760 млн. сум тәшкил итә, яңа эш урынының саны 300дән артып китә.

Аннан соң индустриаль парк территориясендә “Дельрус Чистай” ҖБ” ҖЧҖнең Чистай медицина препаратлары заводы” инвестиция проектының икенче чиратына нигез ташы салу булды.

“Проект без республикада җитештерелгән сыйфатлы медицина преператлары алуга юнәлтелгән”, - диде Илдар Халиков.

Индустриаль паркта инвесторлар өчен уңайлы климат өчен “Дельрус Татарстан” ҖЧҖнең генераль директоры Илгиз Гатауллин рәхмәт белдерде.

“Дельрус” проекты буенча инвестициянең гомуми күләме 700 млн. сумга җитәчәк, яңа эш урыннарының саны- 126.