Татарстанда декларация кампаниясе нәтиҗәләре: миллиардерлар саны алты кешедән бергә генә калган

Декларация кампаниясе барышында Татарстан Республикасы гражданнары салым органнарына 245 меңнән артык керемнәр турындагы декларация биргәннәр. Бүген Татарстан Республикасы Министрлар Кабинетында узган традицион брифингта бу турыда Татарстан Республикасындагы Федераль салым хезмәте Идарәсе башлыгы вазыйфаларын башкаручы Марат Сафиуллин әйтте. Брифинг интернет челтәрендә on-line режимда трансляцияләнде, һәм глобаль челтәр кулланучысы булган һәр кеше анда катнашучыларга сораулар бирә алды.
Марат Сафиуллин сүзләренә караганда, узган ел декларация кампаниясе барышында 227 мең декларация бирелгән (18 мең декларациягә, ягъни 8 процентка күбрәк).
“Быелгы декларация кампаниясе нәтиҗәләре зур суммадагы керемле декларацияләр санының ел саен арта баруын раслады”, - диде Сафиуллин әфәнде. Узган ел белән чагыштырганда, Татарстанда миллионерлар саны 10 процентка артып, 10160 кешегә җиткән, шулардан 64 кеше - керемнәренең 100 млн. сумнан артык, 4 кеше 500 млн. сумнан артык булуы турында декларация биргән. Шул ук вакытта республикада миллиардерлар саны алты кешедән бергә генә калган. 2008 елга миллиардер керемнәреннән үз теләге буенча бүлеп бирелгән салым суммасы 253 млн. сум тәшкил иткән.
Татарстан Республикасы Федераль салым хезмәте идарәсе җитәкчесе вазыйфаларын башкаручы, салым салынмаган очракта, салым органнарына үз керемнәре турында кемнәр хисап бирергә тиешлеген журналистларга тагын бер кат искәртеп үтте. Боларга шәхси эшмәкәрләр, адвокат, нотариус һәм башка хосусый практика белән шөгыльләнүче кешеләр; милекне, автотранспорт чараларын яки башка кыйммәтле әйберләрен арендага бирү яки сатудан керем алган гражданнар һәм ниндидер бүләк откан кешеләр керә.
Моннан тыш, 2008 елдан гражданнарның яңа категориясе өстәлде. Болар – 2008 елда фән, әдәбият, сәнгать әсәрләре, шулай ук эшләнмәләр, файдалы модельләр һәм сәнәгать үрнәкләре авторларының эшен дәвам иттерүчеләр буларак бирелә торган бүләкләүләр рәвешендә керем алган гражданнар.
Массакүләм мәгълүмат чаралары вәкилләренең сорауларына җавап биреп, Марат Сафиуллин 2009 елда инде якынча 63 мең кешенең – торак сатып алу һәм төзү буенча тотылган милек салымнары акчасын, 54 мең гражданның социаль салым өчен тотып калынган акчаны кире кайтару өчен гариза язганлыгын әйтте. Салым өчен тотып калынган акчаларны кире кайтару өчен декларация бирү вакыты чикләнмәгән. Бердәнбер шарт – салым түләүчеләр декларацияләрен өч ел дәвамында тәкъдим итәргә тиеш.
Бүгенге көндә бик күп кешенең финанс проблемалары барлыкка килде, ә милек салымы яки социаль салым өчен тотып калынган акчаны бюджеттан кире кайтару гаилә бюджетын шактый тулыландырырга мөмкин. Әйтик, 2008 елның 4 аенда бюджеттан 232,6 млн. сум салым акчасы кайтарылган булса, 2009 елның шул ук чорында бу күрсәткеч 413,7 млн. сумга җиткән (ягъни 1,7 тапкыр арткан).