ТР Президентының социаль мәсьәләләр буенча ярдәмчесе Татьяна Ларионова “Мәктәпкә җыенырга ярдәм ит” республика акциясе турында сөйләде

Фаразларга караганда, быел Татарстан мәктәпләренә беренче сыйныфка укырга 39 мең 44 бала керәчәк. Аларның 6 меңгә якыны ярдәмгә мохтаҗ. Бу аз керемле, асрамага бала алып тәрбияләүче, күп балалы, иминлеге какшаган, ата-анасы инвалид яки эшсез булган гаиләләрдә яшәүче, шулай ук физик мөмкинлекләре чикле булган балалар. Шул хакта бүген ТР Хөкүмәте йортында “Мәктәпкә җыенырга ярдәм ит” акциясенә багышланган брифингта ТР Президентының социаль мәсьәләләр буенча ярдәмчесе Татьяна Ларионова белдерде.

Аның әйтүенчә, акция кысаларында шулай ук 2-11 нче сыйныф укучылары да игътибардан читтә калмаячак. Якынча мәгълүматларга караганда, аз керемле, күп балалы гаиләләрдә тәрбияләнүче, инвалид ата-аналар белән яшәүче, үзләре гарип булган 6687 укучыга хәйрия ярдәме күрсәтеләчәк.

Татьяна Ларионова билгеләп үткәнчә, Татарстанга килгән Украина качаклары балалары, шулай ук акция кысаларында, барлык кирәкле әсбаплар белән тәэмин ителәчәк. Хәзерге вакытта беренче сыйныфка барырга әзерләнүче мондый 86 бала исәпләнә.

Акция Татарстанда 8 нче ел рәттән үткәрелә. Аны хәйрия эшчәнлеге мәсьәләләре буенча республика советы, ТР Мәгариф һәм фән министрлыгы, “Бердәм Россия” Бөтенроссия сәяси партиясенең Татарстан төбәк бүлеге оештыра.

Мәктәп букчасы комплекты составы традицион булып кала бирә: бу канцелярия товарлары, дәфтәрләр, хезмәт һәм рәсем сәнгате дәресләре өчен җыелма, мәктәп формасы комплектлары. Мәдәният елы кысаларында, быел комплектка Татарстанның тарихи-мәдәни мирасы турында альбомнар, китаплар, төбәк компонентын исәпкә алып, балалар әдәбиятын кертү ниятләнә. Моннан тыш, беренче сыйныфка керүче һәр балага “мәдәни көндәлек” тапшырылачак. Кайбер районнарда мәдәният учреждениеләренә бару өчен абонементлар да бирелә.

Татьяна Ларионова әйтүенчә, букчаның уртача бәясе якынча 1,7 мең сум тирәсе, канцелярия товарлары уртача 1,5-2 меңгә төшә.

ТР Президенты ярдәмчесе җиткергән мәгълүматлардан күренгәнчә, быел 7264 беренче сыйныф укучысына, 2-11 сыйныфларда белем алучы 1152 балага ярдәм инде күрсәтелгән. Аерым муниципалитетлар инициативасы буенча, канцтоварлар белән букчалар ярдәмгә мохтаҗ гаиләләрдә үсүче балаларга гына түгел, ә беренче сыйныфка баручы барлык укучыларга бирелә. Кайбер эшмәкәрләр предприятиеләре территориясендә үз хезмәткәрләре балалары өчен “Мәктәпкә җыенырга ярдәм ит” акциясен уздыра.

Алдагы 2007-2013 нче елларда акция кысаларында аз керемле гаиләләрдән 123 мең 96 беренче сыйныф баласына 108,5 млн сум күләмендә ярдәм күрсәтелгән. Былтыр букчалар 22 мең 930 балага бирелгән.