Әлмәттә “Балачак планетасы” ачылды

Бүген Әлмәттә, Төзүчеләр көнен бәйрәм итү кысаларында, заманча 2 нче “Балачак планетасы” балалар үсеше үзәге ачылды. Тантаналы ачылышта Татарстан Премьер-министры Илдар Халиков, ТР төзелеш, архитектура һәм торак-коммуналь хуҗалык министры урынбасары Юрий Аляшев, ТР Профсоюзлар федерациясе рәисе Татьяна Водопьянова, Әлмәт муниципаль районы башлыгы Мәҗит Салихов, “Татнефть” ААҖ генераль директорының кадрлар һәм социаль үсеш буенча урынбасары Рөстәм Мөхәммәдиев, ТР Дәүләт Советы депутаты Николай Кольгин һәм башка рәсми затлар катнашты.

“Балачак планетасы” балалар үсеше үзәге шәһәрнең яшь һәм тиз үсештәге районнарының берсе– “Яшьлек” микрорайонында төзелгән. “Татнефть” ААҖ акчасына төзелгән, яңа балалар бакчасы яшь гаиләләр өчен көтелгән бүләк булды. Ул 260 урынга исәпләнгән һәм бер елдан да кимрәк вакытта төзелеп беткән. Аның төзелеше узган елның ноябрендә башланган булган.

Илдар Халиков яңа объекта югары бәя бирде, шәһәр җитәкчелегенә һәм “Татнефть” компаниясенә балаларга булган аерым мөнәсәбәт өчен рәхмәт белдерде. “Бу чын балалар сарае һәм ачылыш тантанасының төзүчеләрнең һөнәри бәйрәме көнендә узуы да бик гыйбрәтле. 10 ел элек бу урында берни дә юк иде, ә хәзер монда үсеш алган инфраструктурасы белән тулы бер микрорайон барлыкка килде. Хезмәтегез өчен рәхмәт сезгә төзүчеләр”, - диде Илдар Халиков үзенең чыгышында һәм яңа балалар бакчасына 4 проекцион комплект сатып алу өчен сертификат һәм 13 ноутбук тапшырды.

“Балачак планетасы”нда 12 төркем эшләячәк, шуларның берсе 1,5 яшьтән алып 2 яшькә кадәрге балалар өчен. Монда техник иҗатны үстерәчәкләр. Балалар бакчасында музыка һәм физкультура заллары, методик кабинет, татар теле кабинеты, педагог-психолог, медицина кабинетлары, азык-төлек блогы, кер юу урыны, учреждение территориясендә спорт-уеннар мәйданчыгы бар.


“Балачак планетасы – “Яшьлек” микрорайонында инде икенче балалар бакчасы. Аның беренче, “Бәлкәәч” исемлесе, 2011елда төзелгән була.