Илдар Халиков: “Әлмәт төзүчеләренең – аерым кабатланмас почерк!”

Бүген Әлмәт төзүчеләре үзләренең һөнәри бәйрәмнәрен билгеләп үтәләр. Бу уңайдан ТР Премьер-министры Илдар Халиков катнашындагы чаралар “Яшьлек” микрорайонында 260 урынга исәпләнгән “Балалар планетасы” исемле заманча балалар үсеше үзәге ачылу белән башланып китте.

Аннан соң, делегация Төзүчеләр һәйкәленә чәчәкләр салды. Катнашучылар ветераннарны, хезмәт вазыйфаларын башкарганда һәлак булганнарны бер минутлык тынлык белән искә алдылар.

Төп тантана “Нефтьче” мәдәният йортында узды. Дәрәҗәле кунаклар, “Татнефть” ААҖ вәкилләре, шәһәрнең төзелеш оешмалары җитәкчеләре, төзелеш тармагы ветераннары, шәһәрнең һәм районның мактаулы гражданнары Төзүчеләр көнен тантаналы төстә бәйрәм итәргә җыелдылар.

“Әлмәт төзүчеләре һәрвакыт үзенчәлекле почерклары белән аерылып тордылар. ТР да торак тапшыру күрсәткечләре буенча Әлмәт районы гадәттәгечә алдынгылар рәтендә бара. Торак төзелеше программасын, шул исәптән социаль ипотека программасын гамәлгә ашыруга “Татнефть” ААҖ зур өлеш кертә. Сезнең уртак тырышлыгыгыз белән Әлмәт Россиянең заманча һәм барлык уңайлыклары булган шәһәрләренең берсенә әверелде. ТР Президенты, Хөкүмәт, Дәүләт Советы һәм шәхсән үз исемемнән сезне һөнәри бәйрәмегез белән котлыйм. Хезмәтегез өчен рәхмәт сезгә!”, - диде Илдар Халиков, Әлмәтнең төзелеш тармагы ветераннарына һәм алдынгыларына мөрәҗәгать итеп.

Илдар Халиков шулай ук төзелеш алдынгыларына республика бүләкләрен тапшырды.

“Нефтьче” мәдәният йорты мәйданчыгында заманча төзелеш материаллары күргәзмәсе оештырылган иде. Анда Әлмәт һәм Татарстанның башка шәһәрләре предприятиеләре һәм оешмалары үз продукцияләрен тәкъдим иттеләр.

Кич белән мәйданчыкта татар эстрадасы йолдызлары катнашында бәйрәм концерты булды.