Татарстан Республикасында урып-җыю барышында 3,1-3,2 млн. тонна иген сугып алыначак

Татарстан Республикасында урып-җыю барышында 3,1-3,2 млн. тонна иген сугып алыначак. Бу хакта бүген Татарстан Республикасы Министрлар Кабинетында узган брифингта ТР авыл хуҗалыгы һәм азык-төлек министрының беренче урынбасары Николай Титов хәбәр итте.

Брифинг уңыш җыю һәм мөгезле эре терлек өчен азык әзерләү мәсьәләләренә багышланган иде. Бу чара республиканың барлык муниципаль районнары белән видеоконференцэлемтә режимында узды, шулай ук интернет челтәрендә on-line режимында трансляцияләнде.

Николай Титов хәбәр иткәнчә, бөртеклеләрнең уңышын җыюны 5 сентябрьгә тәмамлау планлаштырыла. Аның сүзләренчә, тиз арада бөртеклеләрне һәр көнне 110 мең тонна суктыру планлаштырыла.

Искә төшерәбез, бүгенгә 580 мең гектарда, яисә 37%, 1,3 млн. тонна сугып алынган, республика буенча уртача уңыш гектарыннан 22,5 ц чыга.