Казанның Вахитов районы җәмәгать судьялары яңа офис алдылар

Бүген Казанда Вахитов районы җәмәгать судьяларының яңа бинасы ачылды. Судьяларны яңа бинага күченүләре белән котларга Татарстан Премьер-министры Илдар Халиков, ТР Югары Суды рәисе Илгиз Гыйлаҗев, Татарстан юстиция министры Лариса Глухова килде.

ТР Премьер-министры Илдар Халиков Вахитов районы җәмәгать суды вәкилләрен сәламләп, аларны яңа бинага күченүләре белән котлады. “Соңгы вакытта без мондый чараларда еш катнашабыз, чөнки безгә җәмәгать судьялары һәм гражданнар өчен уңай шартлар булдыру мөһим”,- диде ул.

Җәмәгать судьялары институты яшь булуына карамастан, халык арасында популярлаша. “Узган ел Татарстанда җәмәгать судьялары тарафыннан 65 мең эш каралды, бу ТР да суд эшләренең 76 %ын тәшкил иткән”, - дип искә алды Илдар Халиков.

ТР Югары Суды рәисе Илгиз Гыйлаҗев хәбәр иткәнчә, республика җәмәгать судьялары 70% гражданнар эшен, 40% тан артык җинаять һәм 80% административ эшләрне карый. “Вахитов районында бары тик 8 участок, ләкин алар Татарстанда җәмәгать суды эшләренең 15% ын карыйлар”, - дип ассызыклады Илгиз Гыйлаҗев.

Тантана тәмамланганда, Илдар Халиков Вахитов районы җәмәгать судьяларына, шулай ук бинаны капиталь төзекләндерүдә катнашкан төзүчеләргә Рәхмәт хатлары тапшырды.