Илдар Халиков: “Кайбыч районы – күп күрсәткечләр буенча алдынгыларның берсе”

Татарстанның Кайбыч районы республикада күп күрсәткечләр буенча алдынгыларның берсе санала. Бу хакта бүген ТР Премьер-министры Илдар Халиков райондагы эшлекле очрашуы барышында хәбәр итте.

Татарстан Хөкүмәте башлыгы беренче булып Иске Тәрбит авылында булды, монда ул күп функцияле үзәк ачылышында катнашты.
Премьер-министр авыл халкын яңа мәдәни үзәк ачылу белән котлады һәм яшьләргә бу үзәктә үз урыннарын табуны теләде.

Олы Кайбычта Илдар Халиков ТР яшьләр эшләре һәм спорт министры Рафис Борһанов озатуында төзелеп килүче, бассейнлы спорт комплексын карады, аннан соң, район мәдәният йортында Кайбыч районы активы белән очрашты.

Район башлыгы Альберт Рәхмәтуллин районның үсеше турында, республика программаларының гамәлгә ашырылуы турында сөйләде.

“Кайбыч районы күп күрсәткечләр буенча алдынгыларның берсе санала. Сезгә бу күрсәткечләрне саклауны телим, һәм хезмәтегез өчен рәхмәт белдерәсем килә”, - диде Илдар Халиков очрашуда катнашучыларга мөрәҗәгать итеп.