Татарстан Республикасы Премьер-министры Илдар Халиков Арча муниципаль районында булды

Татарстан Республикасы Премьер-министры Илдар Халиков бүген Арча муниципаль районына булган эшлекле сәфәре кысаларында Арча шәһәренең 7нче гомуми белем бирү мәктәбендә булды.

1989 елда төзелгән ике катлы бинага капиталь ремонт ясалган. Илдар Халиков мәктәпнең спорт залын, тарих, география, химия һәм биология кабинетларын, актлар залын, медпунктны карады.

Мәктәп директоры Альмира Гатауллина Илдар Халиковка гомуми белем бирү учреждениесенең яңа уку елына әзерлеге, узган капиталь ремонт һәм киләчәккә планнар турында сөйләде. Мәктәптә 200 дән артык укучы укый, якынча 30 укытучы эшли.

Татарстан Премьер-министры шулай ук республика социаль ипотека программасы буенча төзелгән ике 24 фатирлы торак йортта яшәячәк кешеләргә яңа фатир ачкычларын тапшыру тантанасында катнашты.

Илдар Халиков һәм аны озата йөрүчеләр Арча шәһәре үзәгендә 260 урынлык “Шатлык” балалар бакчасы төзелешенең барышы белән таныштылар. Моннан тыш, Илдар Халиков Арча муниципаль районы активы белән очрашты. Бу чара күпфункцияле мәдәният-спорт үзәгендә узды.