Илдар Халиков яңа уку елына әзерлек буенча киңәшмәдә катнашты

Россия Федерациясе Премьер-министры Дмитрий Медведев бүген 2014-2015 уку елы башлануга мәгариф системасының әзерлеге турында видеоконференция режимында бөтенроссия киңәшмәсен уздырды. Казан Кремленнән видеоэлемтә буенча киңәшмәдә Татарстан Республикасы Хөкүмәте башлыгы Илдар Халиков катнашты.

2014 елда Россия мәгариф системасы үсешендә башкарылган эшләр турында сөйләгәндә, Дмитрий Медведев, РФ бюджетыннан икенче ел рәттән балалар бакчаларындагы чиратны кыскарту өчен 50 млрд сум күләмендә акча бүлеп бирелүен искә төшерде. Быел яңа уку елына 449 яңа балалар бакчасы ачылачак. РФ Премьер-министры сүзләренчә, балалар бакчаларына чират проблемасы 29 төбәктә тулысынча хәл ителгән. Шул ук вакытта, Кырым федераль округын санамыйча, тагын 300 мең бала балалар бакчасы белән тәэмин ителмәгән. “Мондый шартлар 2016 елга төзәтелергә тиеш”, - дип ассызыклады Дмитрий Медведев.

Шулай ук яңа уку елына илдә 55 яңа мәктәп төзелгән. Дмитрий Медведев төбәк җитәкчеләренә балалар бакчалары төзелешенә генә түгел, бәлки гомуми белем бирү мәктәпләре төзелешенә һәм аларга капиталь ремонт ясауга да игътибар итәргә чакырды.

Дмитрий Медведев билгеләгәнчә, 2014-2015 уку елының үз үзенчәлекләре бар. Кырымда балалар беренче тапкыр Россия стандартлары нигезендә укый башлыйлар. Шулай ук 1 нче сентябрьдә Россия мәктәпләренә Украинадан килгән гаиләләрнең балалары барачак.

Уку елына әзерлек буенча РФ мәгариф һәм фән министры Дмитрий Ливанов чыгыш ясады, шулай ук киңәшмә барышында төбәк җитәкчеләре докладлары тыңланды.