Татарстан Премьер-министры Рөстәм Миңнеханов “PvT Capital” компаниясе вәкилләре белән Казанда дүртенче җылылык чыганагын төзү проекты турында фикер алышты

Бүген Татарстан Республикасы Премьер-министры “PvT Capital” (Германия) компаниясе вәкилләре белән Казанда дүртенче җылылык һәм электр энергиясе чыганагын төзү мәсьәләләре буенча киңәшмә үткәрде.
Шуны да искәртик: элегрәк Казан ихтыяҗларын канәгатьләндерү максатыннан СГТ-600 газ турбинасы станциясен төзүнең инвестицион проекты (җитештерүче - “Сименс” компаниясе) турында 28 нче майда фикер алышканнар иде.
Дүртенче җылылык чыганагын төзү мәйданчыгы итеп Республика клиник хастаханәсе, “Кояшлы шәһәр” торак кварталы янындагы (шулай ук булачак Универсиада-2013 авылына якын торган) территория сайланган.
Бүген проектның потенциаль инвесторы - “PvT Capital” компаниясе вәкилләре Татарстан Республикасының хөкүмәт башлыгына объектны алдан планлаштыру кысаларында нәрсәләр эшләнгәнлеге (кирәкле җиһазларны билгеләү, киләсе партнерлар белән сөйләшүләр) турында сөйләделәр. План-график нигезендә, төзелешне башлап җибәрүдән аны тәмамлауга кадәр 25 ай вакыт бирелә.
Татарстан Республикасы Премьер-министры бөтен ведомстволарга әлеге инвестиция проектының әзерлек этабындагы эшкә җаваплы карарга кушты: булачак мәйданчыкны инфраструктура белән тәэмин итәргә, җир калдыру мәсьәләләрен җайга салырга, газ турбинасы станциясен эксплуатацияләү өчен кирәк булачак газ һәм су лимитын билгеләргә, проектка тиешле инстанцияләрдә (шул исәптән федераль структураларда) рөхсәт алырга кирәк.
Очрашуда Татарстан Республикасының төзелеш, архитектура һәм торак-коммуналь хуҗалык министры Марат Хөснуллин, “Татинвестгражданпроект” дәүләт унитар предприятиесе җитәкчесе Ирек Фәйзуллин, Казан мэриясе вәкилләре, Татарстан Республикасы Министрлар Кабинеты аппаратының төзелеш, транспорт, элемтә, торак-коммуналь хуҗалык һәм юл хуҗалыгы идарәсе башлыгы Илдар Сибгатуллин һәм башкалар катнашты.