Журналистларга Татарстан делегациясенең Төркия Республикасына сәфәре нәтиҗәләре турында сөйләделәр

2013 елда Татарстан Республикасы һәм Төркия Республикасы арасында товар әйләнеше 660 млн. АКШ доллары тәшкил иткән, шуларның 357 млн. доллары экспортка һәм 303 млн. доллары импортка туры килә. Бу хакта бүген ТР Хөкүмәте йортында узган брифингта ТР Инвестицион үсеш агентлыгы җитәкчесе Талия Миңнуллина хәбәр итте.

Брифинг гадәттәгечә республиканың барлык муниципаль районнары белән видеоконференцэлемтә режимында узды, шулай ук интернет челтәрендә трансляцияләнде.
Брифингта катнашучылар журналистларга ТР Президенты җитәкчелегендә Татарстан Республикасы делегациясенең Төркия Республикасына сәфәре нәтиҗәләре турында сөйләделәр (2014 елның 30 ноябре – 1 декабре).

ТР сәнәгать һәм сәүдә министрының беренче урынбасары Руслан Кәбиров хәбәр иткәнчә, Татарстан Президенты Төркиянең министрлык һәм ведомство җитәкчеләре, шул исәптән Төркия Республикасы тышкы эшләр министры Мәүлет Чавушоглы, икътисад министры Нихат Зейбекчи, Әнкарә мэры Мәлих Гекчек, "Синджан" оешкан сәнәгать зонасы һәм Билькент университеты җитәкчелеге белән очрашты.

Руслан Кәбиров билгеләгәнчә, Әнкарә һәм Татарстанның Сәүдә - сәнәгать палаталары арасында хезмәттәшлек турында килешү имзаланган.

Талия Миңнуллина узган очрашулар турында җентекләбрәк сөйләде. Ул, аерым алганда, Республика җитәкчелеге Төркия Республикасы белән хезмәттәшлектә берничә юнәлеш билгеләде, дип ачыклык кертте. Болар текстиль сәнәгатендә, җиһаз җитештерү, медицина, туристлык һәм энергетика өлкәләрендә.

Искә төшерәбез, Татарстан Президентының Әнкарә шәһәренә эш сәфәренең төп чарасы Россия Федерациясе Президенты Владимир Путин һәм Төркия Республикасы Президенты Рәҗәп Тайип Эрдоган рәислегендәге югары дәрәҗәдә Россия-Төркия хезмәттәшлек советының киңәйтелгән утырышында катнашу булды. Россия һәм Төркия башлыклары сөйләшүләре барышында кайбер мәсьәләләр буенча килешүләргә ирешелде.