Васыйл Шәйхразиев : “Социаль иминиятләштерү безнең көндәлек тормышыбызның аерылгысыз өлешенә әверелде”

РФ социаль иминиятләштерү фондының ТР буенча төбәк бүлеге, 2014 ел нәтиҗәләре буенча, 12 миллиард сум акча эшләгән. 2013 ел белән чагыштырганда, бу 800 миллион сумга күбрәк. Бу хакта бүген РФ социаль иминиятләштерү фондының ТР буенча төбәк бүлеге җитәкчесе Рамил Гайзуллин ведомство коллегиясенең киңәйтелгән утырышында хәбәр итте. Утырышта ТР Премьер-министры урынбасары Васыйл Шәйхразиев катнашты.

“Бу бик зур проект һәм аның максаты — дәүләт тарафыннан гарантияләнгән пособиеләрне эш бирүченең финанс хәленә бәйле булмыйча, вакытында һәм тулысынча түләүне тәэмин итү. Башка төбәкләрдә күрсәткән тәҗрибә буенча, яңа системага күчү чыгымнарны контрольда тотуда да икътисади нәтиҗәләр бирә”, - диде Рамил Гайзатуллин.

Бу проект иминиятләштерүчегә пособияләрне санау, билгеләү һәм түләү буенча төшкән эш күләмен киметә, иминиятләшкән кешегә пособиеләрне дөрес һәм вакытында алу мөмкинлеге бирә дип, пособиеләрне түләгәндә мошенниклык очракларын киметәчәгенә ышандыра Рамил Гайзатуллин.

Фонд җитәкчесе белдергәнчә, керемнәрнең күбесе вакытлыча эшли алмау һәм ана булу белән бәйле взнослардан кергән (9,8 миллиард сум). Шулай ук, сәнәгать өлкәсендә бәхетсезлек очракларыннан иминиятләштерү нәтиҗәсендә, 1,9 миллиард сум күләмендә иминиятләштерү взносы кертелгән.

Сәнәгать өлкәсендә зыян күрүчеләргә 2014 елда 1,4 миллиард сум күләмендә акча түләнгән. Аларның гомуми 903,3 миллион сумы ай саен түләп барылган, 35,7 миллион сумы исә берьюлы бирелгән. Шулай ук, вакытлыча эшкә яраксыз булу сәбәпле (больничный) түләүләр суммасы, 2013 ел белән чагыштырганда, 11,5 процентка арткан һәм 4,3 миллиардны тәшкил иткән. Чыгымнарның артуы көнлек пособянең үсүенә бәйле, дип аңлатты Рамил Гайзатуллин.

Ул шулай ук, протезлар, дәвалануның техник чаралары өчен түләү, шифаханәләрдә дәвалануга 211,3 миллион сум юнәлдерүен хәбәр итте.
Узган ел ТРда, эш урынында бәхетсезлек очрагы нәтиҗәсендә, 68 кеше һәлак булган. 2013 елда бу сан 103не, ягъни 34 процентка артыграк булуны күрсәтә.

“Һәр бәхетсезлек очрагы предприятие фирма өчен генә түгел, ә гаиләләр өчен дә зур кайгы. Эш урынында килеп чыккан фаҗигале очраклар буенча беренче урында төзелеш өлкәсе тора. Узган ел төзелештә 20 кешенең гомере өзелгән”, - диде бүген ведомство коллегиясенең киңәйтелгән утырышында ТР Премьер-министры урынбасары Васыйл Шәйхразиев. - Теләсә нинди эш башлаганда да аңа инструктаж уздыру мөһим һәм бу сәнәгатьтә беренче урында булырга тиеш. Аяныч нәтиҗәләргә китергән имгәнүләр саны да узган ел кимемәгән һәм шундый 172 очрак теркәлгән, 2013 елда бу сан 173не тәшкил иткән булган. Хезмәт куркынычсызлыгын саклау һәм кешеләргә эшләү өчен уңайлы шартлар тудыру төп максат булып кала бирә”, - диде ул.

Васыйл Шәйхразиев фонд хезмәткәрләренә уңышлы эшләре өчен рәхмәт белдерде. “Бүген социаль иминиятләштерү безнең көндәлек тормышыбызның аерылгысыз өлешенә, ә Социаль имниятләштерү фонды эшләүче гражданнарның проблемаларын хәл итүче оешмага әверелде”, - диде ТР Премьер-министры урынбасары.