Татарстан Республикасы Хөкүмәте һәм Сингапурның Дәүләт сәясәте мәктәбе җитәкчелеге арасында үзара ярдәм итешеп эшләү һәм хезмәттәшлек итү турындагы Килешүгә кул куелды

Бүген Сингапурда Татарстан Республикасы Хөкүмәте һәм Сингапурның Ли Куан Ю исемендәге Милли Университеты каршындагы Дәүләт сәясәте мәктәбе җитәкчелеге арасында үзара ярдәм итешеп эшләү һәм хезмәттәшлек итү турындагы Килешүгә кул куелды.
Документка Татарстан Премьер-министры Рөстәм Миңнеханов һәм мәктәпнең деканы, профессор Кишоре Мабубани (Kishore Mahbubani) кул куйды.
Кунакларны сәламләп, Кишоре Мабубани әфәнде мәктәп җитәкчелегенең яңа уртак проект тууга һәрьяклап ярдәм итүен әйтте. Ул шуны искәртеп үтте: Сингапурдагы Дәүләт сәясәте мәктәбе, яшь булуга карамастан (2004 елда оешкан), дөньяның күп кенә илләрендә хөрмәт казанырга өлгергән. Бүген мәктәптә 52 илдән килгән 300 дән артык студент белем ала. “Без дөньяда мондый мәктәпләрнең иң тиз үсеш алганы”, - диде Кишоре Мабубани.
Укыту программасы һәм студентларның белемнәренә куела торган таләпләр бөтендөнья мәгариф стандартларына нигезләнә. Мабубани әфәнде сүзләренә караганда, студентларга Сингапурдагы дәүләт хезмәтләренең барлыкка килүе һәм эшчәнлеге, халыкка дәүләт хезмәте күрсәтү турында белем алу мөмкинлеге дә бирелә. Нәкъ менә Сингапурның дәүләт хезмәтләре бүген дөньяда иң алдынгылары булып тора. Болар, нигездә, шәһәр төзелеше, Сингапурның мәгариф һәм сәламәтлек саклау системалары эше, закон чыгару.
Татарстан Республикасы Премьер-министры Рөстәм Миңнеханов Татарстан өчен Сингапурның дәүләт хезмәтләре күрсәтү өлкәсендәге тәҗрибәсе кызыклы булыр дип уйлавын әйтте. Ул бигрәк тә Татарстан дәүләт хезмәткәрләрен укыту өчен кирәкле махсуслашкан программалар белән кызыксынды. Рөстәм Миңнеханов Сингапурдагы Дәүләт сәясәте мәктәбендә белгечләр укыту аларга бу илнең дәүләт хезмәте күрсәтү өлкәсендәге бай тәҗрибәсен үзләштерергә, башка ил вәкилләре белән фикер уртаклашырга ярдәм итәр дип уйлый.