“Халык инспекторы” кушымтасына өч ай эчендә 5 мең мөрәҗәгать килгән

Бүген ТР Министрлар Кабинетында “Халык инспекторы” системасының эшчәнлеге нәтиҗәләренә багышланган брифинг уздырылды. Анда ТР Премьер-министры урынбасары – ТР мәгълүматлаштыру һәм элемтә министры Роман Шәйхетдинов һәм ТР буенча Эчке эшләр министрлыгының ЮХИДИ идарәсе башлыгы Рифкать Миңнеханов катнашты.

Роман Шәйхетдинов сүзләренә караганда, узган елның 8 ноябрендә эшли башлаган “Халык инспекторы” кушымтасын барлыгы 29 меңгә якын кеше үзенең мобиль җайланмасына урнаштырган. Аларның 53 проценты “Android”, 47 проценты “IOS” операцион системасы кулланучылары.

Татарстанда юл хәрәкәте кагыйдәләрен бозулар турында гражданнарга үзләренә гаризалар җибәрү мөмкинлеген бирә торган әлеге система эшчәнлеге нәтиҗәсендә, ЮХИДИ идарәсе административ хокук бозулар турында 1045 карар чыгарган.
“Халык инспекторы” үзен чын мәгънәсендә халыкныкы итеп танытты, дип сөйләде Роман Шәйхетдинов. Ник дигәндә, система эшли башлаганнан бирле, барлыгы 5094 гариза кабул ителгән. Дөрес, шуларның 894ен төрле сәбәпләр аркасында “call-үзәк” кире каккан. Ә менә гариза-белдерүләрнең 3410ы ЮХИДИгә, 790ы муниципаль берәмлекләрнең административ-техник инспекциясенә тапшырылган.

Хәзерге вакытта барлыгы 1562 гариза буенча карарлар чыгарылган инде. (1045е ЮХИДИ идарәсе, 517се административ-техник инспекцияләр тарафыннан). Белдерү-мөрәҗәгатьләрнең күпчелеге Казан һәм Яр Чаллы шәһәрләрендә яшәүчеләрдән кабул ителгән, дип сөйләде ТР мәгълүматлаштыру һәм элемтә министры.
Аның сүзләренә караганда, иң күп гаризалар автомобильләрне җәяүлеләр юлында (3,5 меңнән артык белдерү) һәм “яшел зона”да куеп калдыру (980 белдерү) уңаеннан килгән. Автобус юлы, җәяүлеләр юлыннан йөрү, рөхсәт ителмәгән урында сулга борылу, “стоп-линия”не кисеп чыгу, светофорның кызыл төсенә чыгу буенча мөрәҗәгатьләр сирәгрәк кабул ителгән.
“Халык инспекторы” кушымтасыннан файдалану никадәр күбрәк булган саен, юлларда тәртип тә шулкадәр югары булачак”, – диде министр үзенең чыгышында.