2015 ел башыннан Татарстанда юл-транспорт һәлакәтендә 58 кеше үлгән

2015 елның ике ае эчендә Татарстанда юл-транспорт һәлакәтендә 58 кеше үлгән. Бу хакта Татарстан Республикасы Министрлар Кабинетында узган брифингта Эчке эшләр министрлыгының ТР буенча ЮХИДИ идарәсе башлыгы Рифкать Миңнеханов сөйләде.

“Җыелган статистик материаллар буенча республикада юл-транспорт һәлакәтендә үлем очракларының кимүе күзәтелә. Быел ике ай эчендә 58 кеше үлгән, узган ел белән чагыштырганда 23 кешегә кимрәк. Әмма зыян күрүчеләрнең саны узган елга караганда күбрәк. Бу саннар алга таба азаячак”, - дип билгеләде Рифкать Миңнеханов.

Моннан тыш, ЮХИДИ идарәсе башлыгы журналистларга 2015 елда Татарстанда 631 юл-транспорт һәлакәте теркәлүен хәбәр итте (узган ел бу вакыт эчендә 611).
“Безнең эшебезне бәяләү критерие – барыннан да элек, үлүчеләр саны. Шуңа күрә, статистик материалларга карап, күзәтчелек эшчәнлеге уңай нәтиҗәләр бирә дип әйтергә мөмкин”, - дип ассызыклады Рифкать Миңнеханов.